पत्रकार महासंघमा आचार्य निर्वाचित

६ भदौं, हेटौँडा । काठमाण्डौंमा भएको नेपाल पत्रकार महासंघको २५ औं महाधिवेशनबाट अध्यक्षमा गोविन्द आचार्य प्यानलसहित विजयी भएका छन् ।  पदाधिकारीमा उनी प्यानलसहित विजयी भएपनि प्रदेशमा भने मिश्रित परिणाम आएको हो । 

प्रेस युनियन र प्रेस सेन्टरसहित पत्रकारका साना संगठनका उम्मेदवार आचार्यले प्रेस चौतारीसहितका पत्रकार संगठनका उम्मेदवार तीर्थ कोइरालालाई १ सय पाँच मतले पराजित गरेका छन् । मंगलबार विहान आएको मत परिणाम अनुसार आचार्यले ७ सय ३२ र कोइरालाले ६ सय २७ मत प्राप्त गरेका छन् । अन्य तिन उम्मेदवार भने निकै कम मत ल्याएका छन् । उजिर मगरले ५४, इन्द्रबहादुर राउतले २० र भावना विद्रोहीले ६ मत प्राप्त गरेका छ ।

खुला उपाध्यक्षमा विपुल पोखरेल, समावेशी उपाध्यक्षमा दिलिप थापामगर, महासचिवमा रमेश विष्ट र खुला सचिवमा रामप्रसाद दाहाल विजयी भए भने महिला सचिवमा लक्ष्मी पुन, आदिवासी जनजाती सचिवमा उदय जीएम, मधेसी सचिवमा शीतलप्रसाद महतो, दलित सचिवमा रेमबहादुर विश्वकर्मा, एशोसियट सचिवमा प्रकाश थापा र कोषाध्यक्षमा राजेश मिश्र निर्वाचित भएका छ ।लेखा समिति संयोजकमा रोशन पुरी र सदस्यहरुमा मिरा राजभण्डारी र भुपेन्द्र आचार्य विजयी भए । 

प्रदेशमा १ नम्बरमा सटेन्द्र जबेगु (प्रेस चौतारी), उद्धव तिमिल्सिना (प्रेस युनियन), प्रदेश नम्बर २ मा देवराम यादव (प्रेस सेन्टर), शैलेन्द्र झा (प्रेस युनियन) प्रदेश नम्बर ३मा चौतारीका द्वारिका काफ्ले र कृष्ण गिरी, प्रदेश नम्बर ४ मा रामकृष्ण ज्ञवाली (प्रेस चौतारी), नवीन कुइँकेल (प्रेस सेन्टर), प्रदेश नम्बर ५ मा बसन्त गिरी (प्रेस सेन्टर), पुरुषोत्तम सुवेदी (प्रेस युनियन) प्रदेश नम्बर ६ मा कलेन्द्र सेजवाल (प्रेस युनियन), पुर्ण प्रसाद चौलागाईं (प्रेस सेन्टर), प्रदेश नम्बर ७ मीन बम (प्रेस युनियन) विजयी भएका छन् भने उत्तर विष्ट (प्रेस चौतारी) र श्याम भट्ट (प्रेस सेन्टर) को बराबर ४५–४५ मत आएको छ ।

काठमाडौं उपत्यकामा लेखनाथ न्यौपाने (प्रेस सेन्टर), गोबिन्द चौलागाईं (प्रेस चौतारी), प्रतिष्ठान तर्फ टिकाराम प्रधान (प्रेस सेन्टर), यम बिरही (प्रेस युनियन) खुला केन्द्रीय सदस्यहरुको मतगणना जारी छ ।