त्रिविलाई ५ विद्यार्थी संगठनको ५ बुँदे ज्ञापनपत्र

१६ असार, काठमाडौं । त्रिभुवन विश्वविद्यालयलाई ५ विद्यार्थी संगठनले ५ बुँदे माग राख्दै ज्ञापनपत्र बुझाएका छन् । लामो समयसम्म शैक्षिक गतिविधि लथालिङ्ग हुँदा पनि त्रिवि प्रशासन निदाएर बसेको भन्दै विश्वविद्यालयका उपकुलपतिलाई विद्यार्थी  संगठनहरुले ज्ञापनपत्र बुझाएका छन् ।
नेविसंघ अध्यक्ष राजिव ढुंगाना, अखिल (क्रान्तिकारी) अध्यक्ष रन्जित तामाङ, अनेरास्ववियूका अध्यक्ष सुदेश पराजुली, समाजवादी विद्यार्थी युनियनका अध्यक्ष रुपनारायण श्रेष्ठ र अखिल छैठौंका अध्यक्ष विमल पोखरेलले संयुक्त रुपमा ज्ञापनपत्रमा बुझाएका हुन् । उनीहरुले १० दिने अल्टिमेटमसहित ज्ञापनपत्र बुझाएका छन् ।  
ज्ञापनपत्रमा विश्वविद्यालयको शैक्षिक सत्रको समयअवधि परीक्षा नलिइकनै समाप्त भएको भन्दै उपयुक्त विधि र समयावधि तोकेर परीक्षा सञ्चालन गर्न तथा शैक्षिक कार्यक्रमहरु क्यालेन्डर बनाएर लागू गर्न माग गरिएको छ । ज्ञापनपत्रमा एम फिल र पीएचडी भर्ना शुल्क बारेको समस्या तत्काल विद्यार्थीहरूसँग संवाद गरि समाधान गर्न पनि माग गरिएको छ । 
ज्ञापनपत्रमा त्रिवि अन्तर्गतका आंगिक क्याम्पसमा लागू गरिएका सबै विषयहरुलाई नीजि क्षेत्रबाट सञ्चालन गर्न बन्द गर्नुपर्ने, आंगिक क्याम्पसहरुमा कानुन विषयको अध्ययन अध्यापनको व्यवस्था मिलाउनुपर्ने माग समेत गरिएको छ ।