चित्रेपानी सामुदायिक वनमा वृहत बृक्षारोपण

१६ असार, हेटौंडा । हेटौडा-६ मा रहेको चित्रेपानी सामुदायिक वन उपभोक्ता समूहमा बुधवार वृहत बृक्षारोपण गरिएको छ । डाबर नेपाल प्रालिको सहयोगमा बृक्षारोपण गरिएको हो ।
जामुन, टोटेलो, कुरिलो, कोइरालो, अमला, हर्रो, बर्रो लगायतका ३० हजार विरुवाको बृक्षारोपण गर्ने योजना रहेको समूहले जनाएको छ ।
हेटौडा सव डिभिजन वन कार्यालयकी प्रमुख गायत्री शर्माले जामुनको विरुवा रोपेर कार्यक्रमको शुभारम्भ गर्नु भएको थियो । लोप हुँदै गएका जडीबुटीजन्य विरुवा रोपेर समूहले राम्रो काम गरेको बताउँदै प्रमुख शर्माले यसबाट समूहलाई प्रयाप्त आयआर्जन हुने बताए ।
कार्यक्रममा डाबर नेपालका एसोसियट मेनेजर विष्णु केसीले कार्यक्रमको बारेमा जानकारी गराउँदै रोपिएका विरुवाको संरक्षण गर्नु पर्नेमा जोड दिए । डाबर नेपालले  सुर्खेत, नुवाकोट, बारा, पर्सा, मकवानपुर, काभ्रे लगायतका ३४ भन्दा बढी जिल्लामा काम गरिरहेको बताउदै समूहले राम्रो काम गरेमा भविष्यमा समेत सहयोग गर्ने बताए ।
समूहका अध्यक्ष सूर्य बहादुर घलानको अध्यक्षतामा भएको कार्यक्रममा हेटौडा सव-डिभिजन वन कार्यालयका फेरष्टर यदु कुमार घिमिरे, सञ्चारकर्मी भीमसेन पौडेल, समूहकी सचिव रजनी गौतम, लेखा संयोजक भानु प्रताप बिडारी, समूहका पदाधिकारी र उपभोक्ताहरुको सहभागिता थियो ।