रानी सामुदायिक वनबाट धन्यवाद ज्ञापन कार्यक्रम

२३ असार, हेटौंडा । हेटौडा–६ चौघडामा रहेको रानी सामुदायिक वन उपभोक्ता समूहले धन्यवाद ज्ञापन कार्यक्रमको आयोजना गरेको छ । आव ०७७/०७८ मा जिल्लास्तरीय उत्कृष्ट पुरस्कार प्राप्त गर्न सफल भएको अवसरमा समूहले धन्यवाद ज्ञापन कार्यक्रमको आयोजना गरेको हो । 
हेटौडा–६ का वडा अध्यक्ष अर्जुनप्रसाद चौलागाईको प्रमुख आतिथ्यता एवम समूहका अध्यक्ष विष्णु प्रसाद न्यौपानेको सभाध्यक्षतामा कार्यक्रम भएको थियो । कार्यक्रममा सामुदायिक वन उपभोक्ता महासंघ, मकवानपुरका अध्यक्ष साधुराम चौलागाई, हेटौडा सव डिभिजन कार्यालयकी सहायक वन अधिकृत गायत्री शर्मा, फरेष्टर यदु कुमार घिमिरे, समूहका सल्लाहकार कृष्ण बिडारी, उपाध्यक्ष केशव धिताल, नौलो बिहानी कृषि सहकारीका अध्यक्ष भरत सापकोटा, कार्यालय सचिव भीमसेन पौडेल लगायतले मन्तव्य व्यक्त गरेका थिए ।
लोपान्मुख सालक संरक्षणमा उत्कृष्ट कार्य गर्दै आएको समूहले  जिल्ला तथा राष्ट्रियस्तरको पुरस्कार प्राप्त गरिसकेको छ । राष्ट्रिय तथा अन्तराष्ट्रिय भ्रमणकर्ताहरुको रोजाईमा परेको रानी सामुदायिक वनले संस्थागत विकास, आयआर्जन, महिला शसक्तीकरण, सामाजिक काम लगायतका कामहरु गर्दै आएको छ । आफनै २ तल्ले भवन भएको यो समूहले वन व्यवस्थापनको साथै पर्यापर्यटकीय क्षेत्रमा समेत काम गरिरहेको छ ।