हेटौंडामा दुईवटा ट्रकबाट २०९ किलो गाँजा सहित ३ जना पक्राउ

३० असार, हेटौंडा । जिल्ला प्रहरी कार्यलय मकवानपुबाट खटिएका प्रहरीले हेटौंडाको छुट्टा छुट्टै दुई स्थानबाट २ सय ९ किलो लागूऔषध गाँजा सहित दुईवटा ट्रक नियन्त्रणमा लिएको छ ।
प्रहरीले पूर्वपश्चिम लोकमार्ग अन्तर्गत हेटौँडा –१५ रातोमाटेमा नियमित सुरक्ष जाँचका क्रममा हेटौँडाबाट बारातर्फ जाँदै गरेको बिआर ०१ जीजी ९४९५ नम्वरको भरतीय ट्रकबाट १६९ किलो लागुऔषध गाँजासहित दुई जनालाई पक्राउ गरेको छ ।
पक्राउ पर्नेहरुमा भारत मोतिहारी बस्ने ३० वर्षीय रविन्द्र राय र सोही ठाउँ बस्ने ३१ वर्षीय मुक्तार सैफिक रहेको मकवानपुरका प्रहरी प्रवक्ता प्रहरी नायब उपरीक्षक जयश्वर रिमालले जानकारी दिए ।
त्यसैगरी मकवानपुर प्रहरीको चेकिङ टोलीले नियमित जाँचका क्रममा पुर्व पश्चिम राजमार्ग अन्तर्गत हेटौंडा–१९ नेवारपानीमा लागुऔषध बोकेको कन्टेनर ट्रक सहित १ जनालाई पक्राउ गरेको छ ।
हेटौंडा तर्फ आउदै गरेको ना ६ ख ३७४१ नम्बरको कन्टेनर ट्रकलाई जाँच गर्दा ४० किलो लागुऔषध गाँजासहित नुवाकोट बेलकोटगढी–४ बस्ने १९ बर्षीय ट्रकका सहचालक दिपक गुरुङलाई पक्राउ गरेको डिएसपी रिमालले जानकारी दिए । पक्राउ परेकाहरुमाथि आवश्यक अनुसन्धान र कानुनी प्रकृया अघि बढाइएको जनाइएको छ ।