५८ लाखको लागतमा डिप ट्युववेल निर्माण सम्पन्न 

तस्विरः प्रस्ट खबर

१४ भदौं, हेटौँडा । हेटौंडा खानेपानी बोर्डले हेटौैंडा उपमहानगरपालिका ४ र ५ लाई लक्षित गरी ५८ लाख रुपैयाको लागतमा डिप ट्युववेल सञ्चालनमा ल्याएको छ । डेढ बर्ष अघि पिप्लेमा निर्माण गरेको डिप ट्युववेलको पानीमा समस्या आएपछि खानेपनी बोर्डले गर्दोई स्थित लक्ष्मी आधारभुत विद्यालय संगै डिप ट्यूववेल सञ्चालनमा ल्याएको हो । 
बुधबार हेटौंडा ४ र ५ का वडा अध्यक्ष नविन सिग्देल र राजेश बाँनियाले संयुक्त रुपमा उद्घाटन गरेका थिए । २०७३ साल मंसिर १६ गतेबाट निर्माण कार्य सुरु भएकोमा डिप ट्यूववेल, पालेघर निर्माण, मेन ट्रान्समिसन पाइपलाइन विस्तार, विद्युत लाइन जडान इत्यादी कार्य गरी ५८ लाख रुपैयाँको लागतमा सम्पन्न भएको बोर्डका अध्यक्ष प्रताप विष्टले बताए । 
नयाँ डिप ट्यूववेल संचालन पश्चात पिप्ले, बाँनिया टोल, चिसापानी र गर्दोइे क्षेत्रमा दैनिक ६ देखी ७ लाख लिटर पानी थप वितरण हुने बोर्डले जनाएको छ । बोर्डले खानेपानीको व्यवस्थापन सम्हाले पश्चात दैनिक ५७ लाख लिटर उत्पादनमा पानी वृद्धि गर्न सफल भएको बेर्डका निमित्त कार्यकारी अधिकृत सुदर्शन ढकालले जानकारी दिए । 
बोर्डले नयाँ र पुरानो गरी १२ स्थानबाट १९ वटा पम्प र २ वटा सतहगत स्रोत संचालनमा ल्याई दैनिक १ करोड २७ लाख लिटर पानी वितरण गदै आएको छ । सेवा क्षेत्र भित्र १३ हजार १सय ३१ धाराहरुबाट दैनिक ६ देखि ७ घण्टा पानी वितरण गर्दे आइरहेको बोर्डले जनाएको छ ।