गाउँपालिकाका अध्यक्ष खनालले पुस्तकालयलाई गरे आर्थिक सहयोग

३ साउन, हेटौंडा । मकवानपुरको बकैया गाउँपालिकाका अध्यक्ष दामोदर खनालले आफ्नो जन्मदिनको अवसरमा गाउँपालिकामा संचालनमा आएको पुस्तकालयलाई आर्थिक सहयोग गरेका छन् ।
अध्यक्ष खनालले एकसाता अघि पुस्तकालय अभियान समूह मकवानपुरले ५० हजार रुपैयाँको पुस्तक सहयोग गरेपछि सुरु भएको बकैया सार्वजनिक पुस्तकालयलाई पुस्तक खरिदका लागी १० हजार रुपैयाँ सहयोग गरेका हुन । 
उनले शनिबार पुस्तकालय सञ्चालन तथा व्यवस्थापन समिति गठन गर्न आयोजित भेलामा आफ्नो जन्मदिनको अवसरमा पारेर आर्थिक सहयोग गरेका हुन । बकैया गाउँपालिका वडा नम्बर –४ का वडा अध्यक्ष राजन दंगालको सभाध्यक्ष एवं बकैया गाउपालिका अध्यक्ष खनालको प्रमुख आथित्यमा भेला भएको हो ।

भेलाले सुस्मिता घोरसाइनीको अध्यक्षतामा ११ सदस्यीय पुस्ताकालय संचालन तथा व्यवस्थापन समिति चयन गरेको छ । समितिको उपाध्यक्षमा रामचन्द्र खड्का, सचिवमा हरिप्रसाद दाहाल र कोषाध्यक्षमा अमोद बस्नेत चयन भएका छन् । यसैगरी सदस्यहरुमा दीपक गौतम, गोविन्द चौलागाई, प्रकाश बस्नेत, रञ्जु चौलागाई, सुशील घिमिरे, रमेश फुयाँल र विजय लाल स्याङ्तान रहेका छन् ।
गाउँपालिकाका अध्यक्षले सहयोग गरेको रकमबाट पुस्तक खरिद गरिने पुस्तकालय सञ्चालन तथा व्यवस्थापन समितिका सदस्य गोविन्द चौलागाईले जानकारी दिए ।