मनसुन सुरुभएदेखि अहिलेसम्म ६३ को मृत्यु, ३५ जना अझै बेपत्ता

google

५ साउन, हेटौंडा । यस वर्षको मनसुनसुरु भएदेखि आएका विभिन्न प्राकृतिक विपतबाट नेपालमा ६३ जनाको मृत्यु भएको छ । यस्तै ३५ जना बेपत्ता भएका छन् भने ६३ जना नै घाईत भएका छन् । 
राष्ट्रिय विपद जोखिम न्यूनीकरण तथा व्यवस्थापन प्राधिकरणका प्रवक्ता विश्वप्रकाश अर्यालका अनसार यस वर्षको मनसुनबाट ४८ जिल्ला प्रभावित भएका छन् । प्रवक्ता अर्यालका अनुसार यस मनसुनमा ५ सय ६५ नीजि आवास पूर्ण रुपमा क्षति भएको छ भने, १ सय ५५ घर आंशिक रुपमा क्षति भएको तथा ३७ सरकारी भवन र १२ वटा सामुदायिक भवन तथा विद्यालय क्षति पुगेको छ । 
यसैगरी निर्माणाधिन र निर्माण सम्पन्न भइसकेका २५ जलविद्युत आयोजना, ७ वटा काठेपुलसहित २६ वटा मोटरेवल पुल र २५ वटा झुलुङ्गे पुलमा क्षति भएको पनि उनले जानकारी दिए । गत वर्षको मनसुनबाट क्षति भएका २२ जिल्लाका ४ हजार ९ सय ३७ लाभग्राहीको लागि २९ करोड ९९ लाख २६ हजार २५० रुपैयाँ रकम अवास निर्माण, पुनर्निमाण, पुनस्र्थापना र प्रवलीकरणका लागि निकासा गरिएको पनि प्रवक्त अर्यालले बताए । 
यस आर्थिक वर्षमा भने विभिन्न ८ जिल्लाका ५ सय ७३ लाभग्राहीका लागि २ करोड ८६ लाख ५० हजार रुपैयाँ तत्कालै अस्थायी आवास निर्माणका लागि सम्बन्धित जिल्ला विपत व्यवस्थापन समितिको कोषमा रकम निकासा गरिसकिएको प्रवक्ता अर्यालको भनाई छ । उनले प्राधिकरणले हाल मनसुनबाट भएको क्षतिको विवरण देशभरबाट संकलन गरिरहेको पनि जानकारी दिए ।