पहिरोको जोखिममा बिद्यालय

१५ भदौं, हेटौंडा । बकैया गाउँपालिका २, सरस्वती भमरा स्थित बाल बिकास आधारभुत बिद्यालय पहिरोको जोखिममा परेपछि सहयोगका लागि आग्रह गरिएको छ । 
साबिकको धियाल ९ मा रहेको बिद्यालयको भवनहरु छेउबाटै खनिएको सडक र बर्षादका कारण पहिरो गएको हो । बिद्यालय व्यबस्थापन समितिको बैठकले बकैया गाउँपालिकासहित जिल्ला शिक्षा कार्यालय, जिल्ला भु–संरक्षण कार्यालय, जिल्ला समन्वय समिति लगाएत सरोकारवाला निकायसँग तारजाली माग निर्णय गरेको बिद्यालयका अध्यक्ष तेजप्रसाद चौलागाईले बताए । त्यस्तै भौगोलिक बिकटता, आर्थिक अबस्था कमजोर भएका परिवारका बिद्यार्थीहरु पढ्ने बिद्यालयमा गतिलो भवनको समस्या रहेको भन्दै ६ कोठे पक्की भबन निर्माणका लागि जिल्ला शिक्षा कार्यालय मकवानपुरसँग माग गर्ने उनले बताए ।
बिद्यालयमा ६ कोठे ३ वटा अस्थायी सिकाई केन्द्र प्रयोग गरिएपनि पानी पर्दा भित्र छिर्ने र छानामा प्रयोग गरिएको जस्तापाताको आवाजले पढाई नै अबरुद्ध गर्नुपर्ने बिद्यालयका प्रधानध्यापक हरिवंश खतिवडाले जानकारी दिए । सिकाई केन्द्रका साथै बिद्यालयमा जस्तापाताको छाना भएको २-२ कोठे २ भवन रहेका छन् ।
१ सय ६ जना बिद्यार्थी रहेको बिद्यालयमा ८ जना शिक्षक रहेका छन् । ५० प्रतिशत बढी आदिवासी जनजाति बिद्यार्थी रहेको बिद्यालयमा अधिकांश तामाङ समुदायका बालबालिका अध्ययरत छन् ।