गुम्बा विहार संघर्ष समितिद्वारा ज्ञापनपत्र

१५ भदौं, हेटौँडा । भुकम्प प्रभावित गुम्बा बिहार संघर्ष समिति मकवानपुरले आज प्रधानमन्त्रीलाई ज्ञापनपत्र बुझाएको छ । समितिले जिल्ला प्रशासन कार्यालय मकवानपुरमा मार्फत प्रधानमन्त्रीलाई ज्ञापनपत्र बुझाएको हो ।

भूकम्पपछि धरासयी भएका गुम्बा तथा बिहारको पूनर्निमाणमा सम्बन्धित निकायले कार्यविधि परिवर्तन गरेर बजेट उपलव्ध नगराएको भन्दै समितिले ज्ञापनपत्र बुझाएको हो । मकवानपुरका प्रमुख जिल्ला अधिकारी चक्रबहादुर बुढालाई नेपाल तामाङ घेदुङ मकवानपुरका अध्यक्ष लिलाकुमार घलानल बुझाइएको ज्ञापनपत्र बुझाएका थिए । गुम्बा बिहार पूननिर्माणमा नयाँ कार्यविधि खारेज गरी पुरानै कार्यविधि अनुसार काम गर्न पाउनुपर्ने, आव ०७३/०७४ को विनियोजित बजेट अनुसार योजनालाई तुरुन्तै निरन्तरता दिनुपर्ने, छुटेका गुम्बा बिहारहरुलाई पुननिर्माण कार्यमा समावेश गर्न, गुम्बा पुननिर्माण गर्दा मुर्ति, आर्ट र थान्का समेतलाई समावेश गर्नु पर्ने लगायतका माग समितिको छ ।

समितिका अनुसार मकवानपुरका १ सय ११ वटा गुम्बाले राहतका लागि निवदेन दिए पनि ७९ वटा गुम्बालाई बजेट विनियोजन भएको थियो । समितिका सचिव सुवास लामाका अनुसार मकवानपुरका लागि पहिलो किस्ता बापत  २७ करोड २० लाख २५ हजार बजेट छुटाइएको थियो । नक्साका लागि बजेटको १ प्रतिशतका दरले करिब ३९ लाख ५० हजार रकम प्राविधिक खर्च भएको समितिको दावि छ ।