विहिबार ३ खेल बराबरी, एक खेलमा मल्टिभिजन विजयी

१५ भदौं, हेटौँडा । मकवानपुर जिल्ला फुटबल संघको आयोजनामा हेटौँडामा जारी जिल्ला लिग फुटबल प्रतियोगितामा विहिबार ३ खेल बराबरीमा सकिएको छ भने एक खेलमा एफसी मल्टिभिजन विजयी भएको छ ।

हेटौँडाको लोकतान्त्रिक मैदान हुप्रचौरमा विहान भएको सक्षम युवा क्लब नेवारपानी र न्यू गोल्डेन स्टार स्पोर्टस क्लवको खेल बराबरीमा टुंगिएको थियो । खेल अवधिभर दुबै टिमले गोल गर्न सकेनन् । त्यस्तै, दोस्रो खेल पनि बराबरी भएको छ । आरआरएफसी मनहरी र चुरे नयाँबस्तीबीच भएको खेलमा दुबै टिमले २–२ गोल गरे । मनहरीको तर्फबाट दीपक रुम्बाले १८ र निलम स्यांतानले ४५ औं मिनेटमा गोल गरे भने नयाँबस्तिका लागि अनिल बलले ३ र पवन पाख्रिनले ८ मिनेटमा गोल गरेका थिए ।

अपरान्ह युनाईटेड नाईन क्लब र एफसी मल्टिभिजनबीच भएको खेलामा मल्टिभिजन ३–१ गोल अन्तरले विजयी भएको छ । मल्टिभिजनका लागि सुमन छुमिले २, विवेक गुरुङ ५३ र प्रविण श्रेष्ठ ६३ औं मिनेटमा गोल गरे भने युनाईटेडबाट खेलको ३८ औं मिनेटमा मणी लामाले गोल गरे । बुद्ध युवा क्लब हात्तिसुँडे र चुरेकालिका बीचको खेल बराबरीमा सकिएको छ । दुबैले कुनै पनि गोल गर्न सकेनन् । प्रतियोगितामा जिल्लाका ३७ टिमको सहभागिता रहेको छ । शुक्रबार चार खेल हुने प्रचारप्रसार संयोजक विमल श्रेष्ठले बताए ।