कोभ्याक्स अन्तर्गत नेपालले मोर्डना र फाइजर खोप पनि प्राप्त गर्ने

११ साउन, हेटौंडा । नेपालले कोभ्यास सुविधा अन्तर्गत कोरोना भाइरस विरुद्धको फाइजर र मोर्डना खोप पनि प्राप्त गर्ने भएको छ । 
सोमबार प्रतिनिधि सभाको शिक्षा तथा स्वास्थ्य समितिमा कोरोना संक्रमण रोकथाम तथा नियन्त्रणका लागि सरकारले गरेको कामको बारेमा जानकारी दिने क्रममा स्वास्थ्य तथा जनसंख्या मन्त्रालयको नीति योजना तथा अनुगमन महाशाखाका प्रमुख डा. गुणराज लोहनीले यस्तो बताएका हुन् ।
महाशाखाका प्रमुख डा. लोहनीले असोजदेखि चैतसम्म ३ करोड २३ लाख डोज खोप प्राप्त हुने जानकारी पनि दिए । उनले आगामी चैतसम्म कोरोनाविरुद्धको ४ करोड बढी डोज खोप प्राप्त हुने प्रक्षेपण गरिएको जानकारी दिएका हुन् । 
डा. लोहनीले खोप लगाउन मिल्ने सबै उमेरका व्यक्तिहरुलाई पुग्ने गरि चैतसम्म ४ करोड २८ लाख ४८ हजार डोज खोप आइपुग्ने अनुमान गरिएको जानकारी दिए । असोजसम्म कोभ्याक्स सुविधा, वैदेशिक अनुदान र खरिदबाट गरी १ करोड ५ लाख ४८ हजार डोज खोप प्राप्त हुने पक्का भएको बताए ।
डा. लोहनीले कोभ्याक्सबाटै कोभिसिल्ड, मोडर्ना, फाइजर, जोनसन, सिनोभ्याक्स आदि गरी १ करोड ५० लाख डोज खोप प्राप्त हुने जानकारी दिए । यसैगरी असोजदेखि चैत सम्ममा बालबालिकाहरुका लागि ६० लाख डोज फाइजर खोप पनि उपलब्ध हुने डा. लोहनीको भनाई छ ।