मेलम्चीमा पुनः बाढी आउँदा रेडियो मेलम्चीको भवन बगायो

१७ साउन, सिन्धुपाल्चोक । सिन्धुपाल्चोकको मेलम्चीमा शनिवार राति आएको बाढीले केही घरमा क्षति पुर्याएको छ । तालामाराङको प्रहरी चौकी विस्थापित भएको छ भने बाढीले रेडियो मेलम्चीको भवन बगाएको छ ।
गएराती काठ, दाउरा, ठूला ढुंगा र लेदोसहित मेलम्ची खोलामा भीषण बाढी आएको हो। बाढीले मेलम्ची बजारमा बांकी रहेका केही भौतिक संरचनामा क्षति पुगेको छ ।
जिल्ला प्रहरी कार्यालय सिन्धुपाल्चोकका डिएसपी प्रकाश सापकोटाले लेदो माटोसहितको बाढीले केही घरमा क्षति पुगेको र केही घरमा पानी पसेको जानकारी दिए । तालामाराङ प्रहरी चौकीमा बाढीको पानी पसेपछि नजिकैको अर्को भवनमा सारिएको छ ।
रातिको बाढीले रेडियो मेलम्चीको भवन बगाएको स्टेशन म्यानेजर देवराज सुवेदीले जानकारी दिनुभयो । असार १ गते गएको बाढीले रेडियो मेलम्चीको भवन भेलले पुरिएको थियो । मानिसहरु बगर बनेको आफ्नो बस्तीबाट भेल र माटो हटाइरहेका बेला फेरि बाढी आएको हो ।
गत असार १ गते ठूलो बाढी आएर जनधनको क्षति पुगेको मेलम्ची र हेलम्बुमा गएराति फेरि बाढी आएपछि स्थानीय त्रसित बनेका छन् । यसअघिको बाढीका कारण तटीय क्षेत्रमा स्थानीय नबसेका कारण मानवीय क्षति भने नभएको बताइएको छ ।
ठूलो पानी परेकाले मेलम्ची र इन्द्रावती नदीको बहाव बढ्दो क्रममा रहेको स्थानीयले बताएका छन् । राति नदीको जलसतह बढेपछि मेलम्ची बजारका बासिन्दा घर छाडेर माथिल्लो क्षेत्र लागेका छन् ।
हेलम्बु गाउँपालिकाको नाकोते क्षेत्रमा पहिरो गएर नदी थुनिएका कारण एक्कासि बाढी आएको प्रारम्भिक अनुमान गरिएको छ । सिन्ुधपाल्चोकका प्रमुख जिल्ला अधिकारी अरुण पोखरेलका अनुसार अहिले चनौटे बजारको बीच भागबाट नदी बगिरहेको छ । प्रमुख जिल्ला अधिकारी पोखरेलले मेलम्ची बजारसम्मका तटीय क्षेत्रका बासिन्दालाई सतर्क रहन खबर गरिसकेको र सबै ठाउँमा सुरक्षाकर्मीलाई अलर्ट अवस्थामा राखिएको जानकारी दिए ।