मकवानपुरमा उकालो लाग्दै कोभिडका बिरामी,छैन कुनै सावधानी

१९ साउन,हेटौंडा। केही दिन ३० प्रतिशत भन्दा कम संक्रमित हुदै आएको मकवानपुरमा  विगत ४ दिनको तथ्याङ्क हेर्दा कोरोना संक्रमितको संख्या प्रत्येक दिनजसो उकालो लाग्दो छ। 

कोरोना संक्रमणमा कमि नआएको भन्दै जिल्ला प्रशासन कार्यालय मकवानपुरले निषेधाज्ञालाई कायमै राखेको छ। निषेधाज्ञा भएपनि सबैखाले पसल,सार्वजनिक यातायात संचालनको अनुमति दिएको छ। निषेधाज्ञा भएतापनि पछिल्लो ४ दिनको तथ्याङ्क हेर्दा कोरोना संक्रमितको दर उकालो लाग्दो अवस्थामा छ।

मकवानपुरमा शुक्रबार साउन १४ गते  ९९ जनामा कोरोना पुष्टि भएकोमा, साउन १५ गते संक्रमित दर हवात्तै बढेर ४३२ पुगेको छ। त्यसैगरी साउन १६ गते एन्टिजेन बिधिबाट मात्र परिक्षण गर्दा २८ जनामा र १७ गते ८८ जनामा कोभिड पुष्टि भएकोमा सोमबार (हिजो) ११८ जनामा कोरोना संक्रमण पुष्टि भएको हो । यसरी गर्दा संक्रमित दर उकालो लाग्ने क्रममै रहेको छ।कोरोना संक्रमितको दर बढ्नुको कारण मकवानपुरमा जारी नाम मात्रको निषेधाज्ञा र आम सर्वसाधारणको असावधानी भएको संवय स्वास्थ्यकर्मीहरू बताउछन। 

हेटौंडा बजारमा थेगिनसक्नु  भिडभाड छ।मानिसहरूले स्वास्थ्य मापदण्ड पालना गरेको पाइदैन भने,भौतिक दुरी नाम मात्रको रहेको छ। कोरोना बढेसँगै मकवानपुरमा कोरोनाबाट मृत्यु हुनेको संख्या पनि बढ्दै गएको स्वास्थ्य कार्यलय मकवानपुरले उपलब्ध गराएको तथ्याङ्कले देखाउँछ,अस्पतालमा बिरामीको संख्या बढेको पाइएको छ।  

समयमानै कोरोना रोकथाममा सम्बन्धित निकायको ध्यान नगए गम्भिर अवस्था आउन सक्ने पक्का देखिन्छ ।