स्वास्थ्य मन्त्रालयबाट हेटौंडामा कोभिड खोपको अनलाइन दर्ता अभियान संचालन

२६ साउन, हेटौंडा । स्वास्थ्य तथा जनसंख्या मन्त्रालयले हेटौंडा उपमहानगरपालिकामा कोरोनाविरुद्धको खोपका लागि अनलाईन दर्ता अभियान संचालन गरेको छ । खोप लगाउन अनलाईन दर्ताका लागि महिला सशक्तिकरण तथा गरिबी निवारण समूह नेपालको सहजिकरणमा मन्त्रालयले हेटौंडा उपमहानगरपालिकामा अभियान संचालन गरेको हो ।
मन्त्रालयले विश्व स्वास्थ्य संगठन र युएनडिपिको आर्थिक एवं प्राविधिक सहयोगमा ७ प्रदेशका ७ स्थानीय तहमा पाइलट प्रोजेक्टको रुपमा अभियान नै संचालन गरेको छ । प्रदेश १ को बिराटनगर उपमहानगरपालिका, प्रदेश २ को कलैया उपमहानगरपालिका, बागमती प्रदेशको हेटौंडा उपमहानगरपालिका, गण्डकी प्रदेशको बेनी नगरपालिका, लुम्बिनी प्रदेशको बुटबल उपमहानगरपालिका, कर्णाली प्रदेशको गुराँस गाउँपालिका र सुदरपश्चिम प्रदेशको धनगढी उपमहानगरपालिकामा सहजकर्ताहरु नै खटाएर अनलाईन दर्ता अभियान संचालन भईरहेको छ । ७ सय ५३ वटै स्थानीय तहमा अभियान संचालन गर्ने र तथ्यांक व्यवस्थापनको उद्देश्यले ७ स्थानीय तहमा पाइलट प्रोजेक्ट संचालन गरिएको स्वास्थ्य विभागका तथ्यांक अधिकृत दिवाकर सापकोटाको भनाई छ ।
अनलाईन दर्तामा सर्वसाधारणको उत्साहजनक सहभागिता देखिएको महिला सशक्तिकरण तथा गरिबी निवारण समूह नेपालकी अध्यक्ष इन्दिरा न्यौपानेले बताईन् । अनलाईन दर्ता गर्दा खोप केन्द्रमा हुने भिडभाड समेत कम भएको सर्वसाधारणको भनाई छ । अग्रिम अनलाईन दर्ता गरी स्वास्थ्य केन्द्रमा खोप लगाउँदा लाईन बस्नु नपर्ने भएकाले सहज ढंगले खोप लगाउन सकिएको हेटौंडा–१५ का विष्णु राईको भनाई छ । सहजकर्ताहरु नै परिचालन गरेर अनलाईन फारम भर्ने व्यवस्था गरेकाले सहजढंगबाट दर्ता र खोप लगाउन पाईएको हेटौंडा–१५ कै ठूलीमाया लामाको भनाई छ ।
अभियानले खोपको दुरुपयोग रोक्ने, बैदेशिक रोजगारी जानेहरुका लागि अत्यागमनमा परेको समस्यालाई सहजिकरण गर्ने, स्वास्थ्य संस्थामा चाप व्यवस्थापन हुने, खोपको राष्ट्रिय तथ्यांकमा दुरुस्तता आउने जस्ता सकारात्मक परिणाम आउने मन्त्रालयको विश्वास छ ।