हेटौंडा खानेपानी व्यवस्थापन बोर्ड ९५ प्रतिशत महसुल उठाउन सफल

२९ साउन, हेटौंडा । हेटौंडा खानेपानी व्यवस्थापन बोडले आर्थिक वर्ष २०७७।७८ मा बिलिङ्ग रकम मध्य ९५.१९ प्रतिशत महसुल उठाउन सफल भएको छ ।  

हेटौंडा खानेपानी व्यवस्थापन बोडले शुक्रवार पत्रकार सम्मेलनको आयोजना गर्दै आर्थिक वर्ष २०७७।७८ मा  बिलिङ्ग गरेकोमा ९ करोड १८ लाख ७२ हजार मध्य ९ करोड १८ लाख ७२ हजार अर्थात ९५.१९ प्रतिशत महशुल उठाउन सफल भएको हो । 

पत्रकार सम्मेलनमा बोर्डले हेटौँडा नगरभित्रका १४ वटा वडाको विभिन्न भु–भागमा बसोबास गर्ने करिब १ लाख ३५ हजार नगरबासिलाई विभिन्न श्रोतबाट दैनिक सरदर १ करोड ५५ लाख लिटर खानेपानी वितरण गर्दै आएको जनाएको छ ।

बोर्डले आर्थिक वर्ष २०७७।७८ को प्रगती विवरण तथा आर्थिक वर्ष ७८।७९ को नीति, कार्यक्रम तथा बजेट प्रस्तुत कार्यक्रम मार्फत नगरबासीलाई एउटा सतहगत,२१ वटा डिप बोरीङ, ७ वटा समवेलबाट नियमित दैनिक ६ देखी ७ घण्टा करिब  २० हजार ८ सय ८४ धाराहरूमा करिब सरदर १ करोड  ५५ लाख लिटर खानेपानी वितरण गर्दै आएको हेटौंडा खानेपानी व्यवस्थापन बोर्डका निमित्त कार्यकारी निर्देशक सुदर्शन ढकालले बताएका छन । 

बोर्डले गत आर्थिक वर्ष २०७७।०७८ मा ९ करोड ६५ लाख १९ हजार रुपैयाँको बिलिङ गरेकोमा ९ करोड १८ लाख ७२ हजार अर्थात ९५.९१ प्रतिशत रकम संकलन गर्न सफल भएको र ४९ लाख ८३ हजार पानी महशुल बक्यौता रहेकोमा ग्राहकाबाट ७३ लाख ३१ हजार अग्रिम महशुल भुक्तानी भएको छ – बोर्डका निमित्त कार्यकारी निर्देशक ढकालले भने ।

पत्रकार सम्मेलनमा बोल्दै हेटौंडा खानेपानी व्यवस्थापन बोर्डका अध्यक्ष प्रताप विष्टले अघिल्लो बर्षको तुलनामा यस बर्ष खानेपानी वितरणमा सफल भएको र चुवावट नियन्त्रणमा केही हद सम्म सफल भएको र चुवावट नियन्त्रणमा अनुगमन टोली गठन गरि काम सुरु गरेको बताए । 

हेटौंडा उपमहानगरपालिका नगर प्रमुख हरि बहादुर महतको प्रमुख आतिथ्यता रहेको कार्यक्रममा पत्रकार महासंघ बागमती प्रदेश महासचिव कृष्ण सारुमगर, पत्रकार महासंघ मकवानपुर अध्यक्ष मणिराज गौतम, उद्योग वाणिज्य संघ मकवानपुरका अध्यक्ष कृष्ण कटुवाल, बोर्डका सदस्य इन्द्र नेपाल लगायतले खानेपानी व्यवस्थापन बोर्डको कार्यक्रम तथा बजेटको बिषयमा मन्तव्य व्यक्त गरेका थिए ।