ईरिक्सा र अटो व्यवस्थापनको माग

१९ भदौं, हेटौंडा । हेटौँडा बजारमा सवारी जाम बढ्दै गएको भन्दै ईरिक्सा र अटो व्यवस्थापनका लागि व्यवसायीहरुले माग गरेका छन् । 
संयुक्त इरिक्सा तथा अटो व्यवसायी प्रचारप्रसार समितिले सोमबार हेटौँडामा पत्रकार सम्मेलन गर्दै हेटौँडा बजारको क्षमता भन्दा बढि ईरिक्सा र अटो रिक्सा भित्रदा बजारमा सवारी जामको अवस्था आएको र यसले ट्राफिक व्यवस्थापनमा समेत समस्या परेको जनाएको छ । 
पत्रकार सम्मेलनमा बोल्दै नेपाल अटो ईरिक्सा व्यवसायी संघका केन्द्रीय अध्यक्ष भीमप्रसाद गौतमले मकवानपुरमा १२ सय अटो र ६ सय मयुरी गुडिरहेको र अझै पनि आयातकर्ताले अटो र ईरिक्सा भित्र्याईरहेको भन्दै यसले बजारको सवारी आवागमनलाई अस्तव्यस्त बनाउने बताए । उनले यसलाई व्यवस्थित गर्न सम्बन्धित निकायले बेलैमा काम नगरे हेटौँडामा पैदल यात्रीले सहज हिड्ने अवस्था समेत नआउने बताए ।
कार्यक्रममा अखिल नेपाल ईरिक्सा मजदुर संघ मकवानपुरका अध्यक्ष कृष्ण रेग्मीले मकवानपुरमा चितवनमा संचालनका लागि रुट परमिट लिएका अटो समेत संचालन भईरहेको भन्दै यसको नियमनका लागि उपमहानगरपालिका र ट्राफिक प्रहरीले चासो दिनुपर्नेमा जोड दिए । उनले ईरिक्सा र अटो विक्रेताले मुनाफाको प्रलोभन देखाएर ईरिक्सा र अटो विक्रि गर्ने गरेपनि अहिले संचालन गरिरहेकाहरुले गुजारा गर्न समस्या परेको दावि गरे । 
कार्यक्रममा उपमहानगरपालिकाले स्टिकरको व्यवस्था गर्ने र ट्राफिक प्रहरीले ईरिक्सा र अटोमा स्टिकर टाँसेर लगत लिने सहमति भएपनि कार्यान्वयन नभएको भन्दै आप्mना समस्याको सुनुवाई नभए आन्दोलन गर्ने चेतावनी दिईएको थियो ।