अझै केहीदिन भारी वर्षाको सम्भावना, सतर्क रहन आग्रह 

१३ भदौ, हेटौंडा । मौसम पूर्वानुमान महाशाखाले अझै केहीदिन भारी वर्षा हुने सम्भावना रहेको बताएको छ । आजदेखि मौसम विस्तारै खुल्ने महाशाखाले अनुमान गरेपनि मनसुनी न्यूनचापिय रेखा अझैपनि नेपालको तराई भूभाग नजिकै रहेकाले आगामी केहीदिन थप पानी पर्न सक्ने बताइएको छ । 
मौसमविद् प्रतिभा मानन्धरका अनुसार न्यूनचापीय रेखाको प्रभावले अहिले प्रदेश १, २, बाग्मती, गण्डकी र लुम्बिनी प्रदेशका केही स्थानमा पानी परिरहेको छ । आज दिउँसो देशको धेरै ठाउँमा हल्कादेखि मध्यम वर्षा हुँदा प्रदेश १, गण्डकी, लुम्बिनी, कर्णाली र सुदूरपश्चिम प्रदेशका थोरै स्थानमा भारी वर्षाको सम्भावना रहेको उनको भनाइ छ । 
यसैगरी आजराति प्रदेश १, बाग्मती, कर्णाली र सुदूरपश्चिम प्रदेशका थोरै स्थानमा भारी वर्षाको सम्भावना रहेको छ । मौसमविद मानन्धरले पर्सि बिहान मौसम केही खुलेपनि राति फेरि पानी पर्ने भएकाले बाढी, पहिरोको जोखिम हुनसक्ने बताइन् । उहाँले आगामी केहिदिन थप वर्षाको सम्भावना रहेकाले सतर्क रहन सबैलाई आग्रह समेत गरिन् । 
यसैबीच आज नारायणी र यसका सहायक नदी कमला, बागमती, पूर्वी राप्ती, तिनाउ, पश्चिम राप्ती, बबई लगायतमा बाढी आउँने भएकाले आसपासका बासिन्दालाई सतर्कता अपनाउन बाढी पूर्वानुमान महाशाखाले अनुरोध गरेको छ ।