गुणस्तरीय शिक्षामा स्थानीय तहको भूमिका महत्वपूर्ण

२३ भदौं, हेटौँडा । शिक्षा क्षेत्रको गुणस्तर सुधार गर्नका लागि स्थानीय तहको महत्वपुर्ण भुमिका हुने हेटौडामा आयोजित कार्यक्रमका सहभागिहरुले बताएका छन् । कार्यक्रममा शिक्षासंग सम्बन्धित निकाय र स्थानीय तहको समन्वयले मात्रै शिक्षा क्षेत्रको सुधार सम्भव रहेकोमा जोड दिईएको थियो ।
नगरस्तरीय शैक्षिक समन्वय समिति हेटौडाको आयोजनामा राष्ट्रिय साक्षरता दिबस तथा शिक्षा दिबसको अबसरमा बिद्यालय शिक्षाको ब्यवस्थापन र गुणस्तर सुधारमा स्थानिय तहको भुमिका बिषयक अन्तरकृया कार्यक्रमका सहभागिहरुले यस्तो बताएका हुन् । शिक्षासंग सम्बन्धित मध्यमाञ्चल क्षेत्रीय शिक्षा निर्देशनालय हेटौंडा, जिल्ला शिक्षा कार्यालय मकवानपुर, नेपाल शिक्षक महासंघ मकवानपुरको समन्वयमा कार्यक्रम गरिएको हो । 
शिक्षा कार्यालयका कर्मचारीहरु र बिद्यालयहरु अब स्थानिय तह मातहतमा रहेर काम गर्नका लागि सहजीकरण गर्न र सजिलो होस भन्ने उद्धेश्यले शिक्षा कार्यालयका प्रमुख तथा स्थानिय तहका जनप्रतिनिधिसहितको सहभागितामा कार्यक्रम गरिएको जनाईएको छ । कार्यक्रममा जिल्ला समन्वय समिति मकवानपुर, उपमहानगरपालिका, नगरपालिका, र नगरपालिकाका प्रमुख एवं प्रतिनिधि, शिक्षाका पेशागत संगठनका प्रतिनिधिहरुको सहभागिता रहेको थियो । 
कार्यक्रममा क्षेत्रीय शिक्षा निर्देशनालय हेटौडाका उपनिर्देशक बद्रीबहादुर पाठकले बिद्यालय तहको शिक्षाको ब्याबस्थापन र गुणस्तर सुधारमा स्थानिय तहको भुमिकाका बिषयमा प्रस्तुतीकरण गरेका थिए । यसैगरी जिल्ला शिक्षा कार्यालय मकवानपुरका जिल्ला शिक्षा अधिकारी बिरेन्द्रजङ थापाले जिल्लाको शिक्षा क्षेत्रको बिषयमा प्रस्तुतीकरण गरेका थिए । कार्यक्रम नगरस्तरीय शैक्षिक समन्वय समिति हेटौडाका अध्यक्ष गणेश प्रसाद हुमागाईको अध्यक्षतामा भएको थियो ।