रामनारायण विडारीको नाम मन्त्रीमा अटेन

३० साउन, हेटौँडा । पुष्पकमल दाहाल नेतृत्वको सरकारमा जाने माओवादी मन्त्रीको सूचिमा मकवानपुरका सभासद् रामनारायण विडारी अटेनन् । माओवादीले आफुले पाएको ८ मन्त्रालयमा मन्त्री हुनेमा उनको नाम नअटेको हो । 
तीन मन्त्रीको यसअघि नै सपथग्रहण भएको छ भने बाँकी पाँचको सूचि तयार भएको थिएन । यसअघि उपप्रधान तथा अर्थ मन्त्री कृष्ण महरा, युवा तथा खेलकुद मन्त्री दलजीत श्रीपाइली र गौरीशंकर चौधरी कृषि मन्त्री भईसकेका छन् । आइतबार भएको छलफलबाट पाँच मन्त्रीको करिव टुंगो लागेको जनाईएको छ । विडारीलाई कानूनमन्त्री बनाउने चर्चा बाहिर आएपनि अन्तिममा आएर कानून मन्त्रीमा सिराहाबाट समानुपातिक सांसद अजय शंकर नायकको नाम बाहिर आएको छ । यसअघि प्रभु साहको नाम आएपनि उनले स्थानीय विकास मन्त्रालयमा दावि गरेका थिए । माग अनुसारको मन्त्रालय नपाएपछि उनको नाम सूचिबाट हटाईएको छ । 
दाहालले धनिराम पौडेललाई शिक्षा, हितराज पाण्डेलाई स्थानीय विकास, राम कार्कीलाई सञ्चार र जनार्दन शर्मालाई उर्जा मन्त्रीमा पठाउने करिव टुंगो लागेको जनाईएको छ । माओवादी केन्द्रले केहीलाई राज्यमन्त्री बनाउने चर्चा समेत चलिरहेको छ । शनिबार राष्ट्रपति विद्यादेवी भण्डारीलाई भेटेका दाहालले काँग्रेसले मन्त्रीहरुको नाम नदिएपछि आफ्नो कोटाका मन्त्रीहरुलाई सपथग्रहण गराउने तयारी गरिरहेका छन् ।