शनिबारको लिग क कस्ले जिते?

तस्विरः सुनिल शिवाकोटी / प्रस्ट खबर

२४ भदौ,हेटौँडा । मकवानपुर जिल्ला फुटबल संघको आयोजनामा हेटौँडाको हुप्राचौरमा  जारी जिल्ला लिग फुटबल प्रतियोगितामा आज शनिबार पनि ४ खेल सम्पन्न भएका छन् । आज सम्पन्न खेलमा क्रमश बुद्ध युवा क्लब हात्तिसुँडे , कमलादेवी युवा क्लब, छिमेकी स्पोर्टस् क्लब र एफसी इन्टरनेट सिटी बिजयी भएका छन । 
 बिहान भएको पहिलो खेलमा बुद्ध युवा क्लब हात्तिसुँडे विजयी बनेको छ । बुद्ध युवा क्लब हात्तिसुँडेले चौघडा फुटबल टिमलाई २–० गोल अन्तरले पाखा लगाएको छ । हात्तिसुँडेका तर्फबाट विजय मोक्तान र नरेश घलानले  गोल गरेका थिए । 

त्यसैगरी  कमलादेवी युवा क्लब र महावीर क्लव बिच सम्पन्न दोस्रो खेलमा कमलादेवी युवा क्लब विजयी बनेको छ । कमलादेवीले  महावीर क्लवलाई १–० गोलले हराएको हो । कमलादेवीको तर्फबाट एकमात्र गोल सुनिल घलानले गरेका थिए । त्यस्तै आजै सम्पन्न  छिमेकी स्पोर्टस् क्लब र बुद्धसामाजिक नमूना क्लब बिचको तेस्रो खेलमा बुद्धसामाजिक नमूना क्लबलाई २–० गोल अन्तरले पराजित गर्दै छिमेकी स्पोर्टस् क्लबले विजयी हुदै अंक जोडेको छ ।  छिमेकीलाई विजयी बनाउन प्रकाशमान राईले  र रमेश राईले   गोल गरेका थिए ।

त्यस्तै आज सम्पन्न एफसी इन्टरनेट सिटी र पशुपति स्पोर्टस् एकेडेमी बिचको  अन्तिम खेलमा इन्टरनेट सिटी ३–१ गोलले  विजयी  भएको छ  । निकै प्रतिस्पर्धाका विच भएको खेलमा इन्टरनेटको तर्फबाट रबि थिङ ,बिक्रम बानियाँ र मनोज घलानले  क्रमश ६, ४५ र ६२ औँ मिनेटमा बललाई  जाली चुमाएका थिए र पशुपतिको तर्फबाट अजय सापकोटाले खेलको ३४ औँ मिनेटमा सान्त्वना गोल गरेका थिए । इन्टरनेट सिटीका डिफेन्डर बिक्रम बानियाँले पशुपतिको प्रहारलाई विफल तुल्याईदिएका थिए भने पशुपतिका गोलरक्षकले विपक्षीको प्रहारलाई रोक्न नसक्दा अंक गुमाउन बाध्य बनेको हो । जित संगै सिटीको अर्को चरणमा पुग्ने संभावना बलियो बनेको छ । ३७ टिमको सहभागिता रहेको प्रतियोगिता असोज ८ गतेसम्म चल्ने छ ।