आईसीसी विश्वकप क्रिकेट लिग-२: अमेरिकामाथि नेपालको जित

२९ भदौ, हेटौंडा । आईसीसी विश्वकप क्रिकेट लिग–२ अन्तर्गतको त्रिकोणात्मक एकदिवसीय अन्तराष्ट्रिय सिरिजको पहिलो खेलमा नेपाल विजयी भएको छ । ओमानको अल अमिरात क्रिकेट मैदानमा सोमबार भएको खेलमा नेपाल अमेरिकाबिरुद्ध ५ विकेटले बिजयी भएको हो ।
अमेरिकाले दिएको २ सय ३१ रनको लक्ष्य नेपालले ४९ ओभरमा मात्र ५ विकेट गुमाएर पूरा गरेको हो । नेपालको जितमा ओपनर कुशल भुर्तेलले ८४, रोहित कुमार पौडेलले ६२ रनको योगदान दिए । 
यसैगरी नेपाललागी विनोद भण्डारी ३७ र कप्तान ज्ञानेन्द्र मल्लले १७ रन बनाए भने कुशल मल्ल १ रनमा आउट हुँदा करण केसी १ रनमा अविजित रहे । अमेरिकाका निसर्ग पटेल र नोस्तुश केन्जिगेले २÷२ तथा सौरभ नेत्रभाल्करले १ विकेट लिए ।
यस अघि टस जितेर पहिले ब्याटिङ गरेको अमेरिकाले ५० ओभरमा ९ विकेट गुमाएर २ सय ३० रन बनाएको थियो । अमेरिकाका लागि मोनान्क पटेलले १०० रनको शतकीय इनिङ्स खेल्दा निसर्ग पटेलले २१ र करिमा गोरेले १६ रन बनाए । 
यसैगरी अभिषेक परादकर, संजय कृष्णमुर्थी र नोस्तुश केन्जिगेले समान १३÷१३ रन जोडे भने जसकरण मल्होत्राले ११ रन र सौरभ नेत्रभाल्कर ६ रन बनाए । यस्तै नेपालका सन्दीप लामिछाने, बिक्रम सोब र सुशन भारीले २÷२ विकेट लिँदा कुशल मल्लले १ विकेट लिए ।
जितसँगै नेपालले ५ खेलमा ६ अंक जोडेको छ । नेपाल अंक तालिकाको छैटौं स्थानमा रहेको छ । अमेरिकाले १३ खेलमा १२ अंक जोडेको छ । अमेरिका दोस्रो स्थानमा रहेको छ । सिरिज अन्तर्गत नेपालले अब दोस्रो खेलमा आज घरेलु टिम ओमानसँग खेल्नेछ ।