अन्तर सहकारी फुटसलको उपाधी प्रतिफललाई

२७ भदौ, हेटौँडा । दिव्यतारा बहुउद्देश्यीय सहकारी संस्था लिमिटेडको आयोजना एवं रेडियो मकवानपुरको व्यवस्थापनमा सञ्चालन भएको अन्तर सहकारी फुटसल प्रतियोगिताको उपाधि प्रतिफल बचत तथा ऋण सहकारी संस्था  लिमिटेडले जितेको छ । 
मङ्गलबार बिहान भएको फाइनल खेलमा साईराम बचत तथा ऋण सहकारीलाई २–० गोल अन्तरले हराउँदै प्रतिफलले उपाधि जितेको हो । निर्धारित समय गोलरहित बराबरी भएपछि थप गरिएको समयमा प्रतिफलले २ गोल गरेको हो । प्रतिफलको जितमा मित्र गौतम नायक बने । ब्याक पास खेल्दै गरेको मौका छोप्दै गौतमले बललाई पोष्टको दिशा दिएका थिए । यस्तै दोस्रो गोल पनि गौतमकै नाममा रह्यो । साईरामका गोलरक्षक अघि बढेको मौका छोप्दै उनले दोस्रो गोल गरेका हुन् । 
निर्माण उपभोक्ता सहकारी र प्रतिफल सहकारीकोबीचमा फाइनल खेल हुनुपर्नेमा निर्माणको बिरुद्धमा उजुरी परेपछि फाइनल खेल्नबाट बञ्चित भएको थियो । प्रतियोगिताको विजेता प्रतिफल सहकारीले नगद १५ हजार र उपविजेता भएको साईरामले १० हजारसहित शिल्ड, मेडल र प्रमाणपत्र प्राप्त गर्नेछन् । दिव्यतारा बहुउद्देश्यीय सहकारी संस्था लिमिटेडको बार्षिक साधारणसाभाको सन्दर्भमा पहिलो पटक मकवानपुरका अन्तर सहकारी फुटसल आयोजना भएको हो । प्रतियोगिताको विजेता उपविजेता टिमलाई असोज ८ गते हुने सहकारीको बार्षिक साधारणसभाको दिन पुरस्कार प्रदान गरिने छ । 
मङ्गलबार प्रतियोगिताको विजेता तथा उपविजेता टिमलाई सहकारीका कोषाध्यक्ष ईश्वर पण्डित, व्यवस्थापक रमेश कोइराला र रेडियो मकवानपुरका स्टेशन संयोजक राममणि दाहालले शिल्ड प्रदान  गरेका थिए । प्रतियोगितामा जिल्लाका ९ सहकारीको सहभागिता रहेको थियो ।