ईपीएल टी–२० क्रिकेटमा भैरहवाको पहिलो जित

१३ असोज, हेटौंडा । एभरेष्ट प्रिमियर लिग (ईपीएल) टी–२० क्रिकेटमा भैरहवा ग्लाडीयटर्सले पहिलो जित निकालेको छ ।
टियु क्रिकेट मैदानमा बुधबार विराटनगर वारियर्सलाई ६ विकेटले पराजित गर्दै भैरहवाले पहिलो जित निकालेको हो ।
विराटनगरले दिएको ९० रनको सामान्य लक्ष्य भैरहवाले १५ ओभर ३ बलमा ४ विकेट गुमाएर पूरा गर्यो । भैरहवाको जितमा उपुल थरंगाले अविजित रहदै सर्वाधिक ३४ रन बनाए । प्रदिप ऐरीले २२ रन जोड्दा तमिम इकबाल र रोहित पौडेलले समान १२÷१२ रन बनाए । विराटनगरका रामनरेश गिरिले २ विकेट लिए । करण केसी र बसन्त रेग्मीले १÷१ विकेट लिए ।
यस अघि टस हारेर पहिले ब्याटिङ गरेको विराटनगर १७ ओभर ४ बलमा अलआउट हुँदै ८९ रन बनाएको थियो । विराटनगरका दिल्शन मुनाविराले सर्वाधिक २५ रन बनाएको इनिङ्समा, सुमित महर्जनले १३ रन बनाउँदा आसिफ शेख र अनिल साहले समान ११÷११ रन  बनाए । यस्तै बसन्त रेग्मीले अविजित १० रन जोडे । 
भैरहवाका धम्मिका प्रसाद र आरिफ शेखले ३÷३ विकेट लिए । अविनाश बोहराले २ तथा दुर्गेश गुप्ता र कृष्ण कार्कीले १÷१ विकेट लिए ।
जितसँगै भैरहवाले २ खेलमा ३ अंक जोडेको छ । भैरहवा शीर्ष स्थानमा उक्लिएको छ । पुछारबाट दोस्रो स्थानमा रहेको विराटनगरको यो लगातार दोस्रो हार हो ।