चित्रेपानी वनले वनपैदावार उपलव्ध गराउदै

१८ असोज,हेटौंडा। हेटौडा–६ र १५ मा अवस्थित चित्रेपानी सामुदायिक वन उपभोक्ता समूहले उपभोक्ताहरुलाई वनपैदावार उपलव्ध गराउने भएको छ। 

समूहको श्रावण १५ गते सम्पन्न भएको २० औं वार्षिक साधारणसभाले उपभोक्ताहरुलाई  वनपैदावार उपलव्ध गराउने निर्णय गरेको बमोजिम नेपाल भारत विद्युत प्रसारण तथा व्यापार आयोजना अन्तरगत संकलन भएको साल, चिलाउने खमारी, बर्रो लगायतका रुखहरु चिरान गरि उपभोक्ताहरुलाई विक्री वितरण गरिएको समूहका अध्यक्ष सूर्य बहादुर घलानले बताए ।

कोरोना संक्रमणका कारण विगत २ वर्षदेखि वनपैदावार संकलन गर्न नसकिएको र यस वर्ष संकलन गरि डिभिजन वन कार्यालयको सहयोगमा उपभोक्ताहरुलाई विक्री वितरण गरिन लागेको समूहले जनाएको छ।समूहले हाल सम्म ९० जना उपभोक्ताहरुलाई करिव ८ सय क्यूविक फिट काठ वितरण गरिएको लेखा संयोजक भानु प्रताप विडारीले बताएका छन। 

काठ नहुदा घर बनाउन सकेको थिईन काठ पाइयो  अव ढुक्क सँग घर बनाउछु उपभोक्ता पूर्णमाया पौडेलले बताईन ।वनपैदावार विक्री वितरणबाट प्राप्त भएको रकमले अधुरो रहेको समूहको भवन निर्माण गर्ने योजना समूहको रहेको छ । यसको साथै वन व्यवस्थापन, महिला आयआर्जन समूह गठन, अवलोकन भ्रमण, सामाजिक विकासका कार्यहरु, छात्रवृति वितरण, आर्थिक सहायता लगायतमा खर्च गर्ने योजना समूहको रहेकीे सचिव रजनी गौतमले बताईन । करिव १ सय २५ हेक्टर क्षेत्रफल रहेको समूहमा ७ सय घरधुरी आवद्ध रहेका छन ।