हाँडीखोलाको सिद्धकालीमा जारी फुटबलमा जनजागरण सेमीफाइनलमा

google

१९ असोज, हेटौंडा । बडादशैंको अवसरमा मकवानपुरको मनहरी गाउँपालिका–३ हाँडीखोलास्थित सिद्धकालीमा जारी फुटबल प्रतियोगितामा मसिनेको जनजागरण युवा क्लव सेमीफाइनलमा प्रवेश गरेको छ । 
सोमबार भएको खेलमा रमनटार युवा क्लवलाई टाइब्रेकरमा ४–३ गोलले हराउँदै जनजागरणले सेमीफाइनलमा स्थान पक्का गरेको हो । सोमबारै भएको खेलबाट जित निकाल्दै एफसी पाल्दमार र युवा जागृति क्लवले क्वार्टरफाइनलमा स्थान बनाएको छ । पाल्दमारले मोडर्न यूथ क्लव मकरीलाई ३–० ले हराएको हो भने युवा जागृतिले सृजनशिल युवा क्लव मनहरी–२ लाई २–० ले हराएको हो । 
जारी प्रतियोगिता अन्तर्गत मंगलबार सेमीफाइनल प्रवेशका लागि लामाबस्ती युवा क्लव र सुन्दर युवा क्लव, एफसी पाल्दमार र जनसिद्ध युवा क्लव ‘बी’ तथा एफसी विजौना र युवा जागृति क्लवले खेल्नेछ । 
जनआदर्श समाज युवा क्लव मनहरी–३ को आयोजनामा पालिकाभित्र रहेका क्लवहरुको बीचमा फुटबल प्रतियोगिता भैरहेको हो । २२ गतेसम्म सञ्चालन हुने प्रतियोगिताको विजेताले ५० हजार र उपविजेताले २५ हजार रुपैयाँसहित ट्रफी र मेडल र प्रमाणपत्र प्राप्त गर्नेछ । 
यस्तै सर्वोत्कृष्ट खेलाडी, विधागत उत्कृष्ट खेलाडी र म्यान अफ द म्याचलाई समेत पुरस्कारको व्यवस्था गरिएको आयोजकले बताएको छ ।