ईपीएल टि–२० भैरहवालाई हराउँदै पोखरा फाइनलमा

२१ असोज, हेटौंडा । पोखरा राइनोज चौंथो संस्करणको एभरेष्ट प्रिमियर लिग (ईपीएल) टी–२०  क्रिकेट प्रतियोगिताको को फाइनलमा प्रवेश गरेको छ ।
टियु क्रिकेट मैदानमा बिहीबार भएको दोस्रो क्वालिफायरमा भैरहवा ग्लाडियसर्टलाई ७ विकेटले पराजित गर्दै पोखरा उपाधि नजिक पुगेको हो ।
भैरहवाले दिएको १ सय २० रनको लक्ष्य पोखराले १८ ओभर २ बलमा मात्र ३ विकेट गुमाएर पूरा गर्यो । पोखराको जितका लागी सहन अर्चाचिगेले ५३, विपिन रावलले ४०, रिचर्ड लेभीले १४ र रित गौतमले ६ रनको योगदान दिए । भैरहवाका भुवन कार्कीले २ विकेट लिए ।
यस अघि टस हारेर पहिले ब्याटिङ गरेको भैरहवाले २० ओभरमा ६ विकेट गुमाएर १ सय १९ रन बनाएको थियो ।  भैरहवाका लागि कप्तान शरद भेषवाकरले सर्वाधिक ३२ रन बनाएको इनिङसमा आरिफ शेखले २७, रोहित पौडेलले १८, प्रदिप ऐरीले ११ र उपुल थरंगाले १० रन बनाए । बाँकी खेलाडी दोहोर अंकसमेत जोड्न सकेनन् । पोखराका किशोर महतो र सहन अर्चाचिगेले समान २÷२ तथा नन्दन यादव र असेला गुनारत्ने १÷१ विकेट लिए ।
यससँगै पोखरा पहिलो पटक ईपीएलको फाइनलमा पुगेको हो । अब पोखराले फाइनलमा चितवन टाइगर्ससँग शनिबार प्रतिस्पर्धा गर्नेछ । चितवन पनि पहिलो पटक फाइनल पुगेको हो । फाइनल खेल यही २३ गते शनिवार हुनेछ ।
प्रतियोगिताको विजेताले ५० लाख र उपविजेताले १५ लाख पाउने आयोजकले जनाएको छ ।