साफको फाइनलमा नेपाल र भारत भिड्ने

file photo

२८ असोज, हेटौंडा । माल्दिभ्समा जारी साफ च्याम्पियनसिप फुटबलको फाइनलमा नेपाल र भारत भिड्ने भएका छन् ।
बुधबार राति राउण्ड रोबिन लिगको अन्तिम खेलमा आयोजक माल्दिभ्सलाई ३–१ गोल अन्तरले पराजित गर्दै भारतले फाइनलमा स्थान बनाएको हो । मालेस्थित राष्ट्रिय रंगशालामा भारतलाई जित दिलाउन कप्तान सुनिल क्षेत्रीले दुई तथा मानबिर सिंहले एक गोल गरे । यस्तै माल्दिभ्सका अलि अस्फाकले एक गोल फर्काए । 
जितसँगै भारत फाइनल पुगेको हो । अब भारतले उपाधिका लागि नेपालको सामना गर्नेछ । नेपाल यसअघि बुधबारनै भएको खेलमा बंगलादेशलाई १–१ गोलको बराबरीमा रोक्दै फाइनल पुगेको हो ।
नेपालका लागी अन्जन विष्टले पेनाल्टी मार्फत एक गोल गरेका थिए । यस्तै खेल सुरु भएको नौ मिनेटमै बंगलादेशले सुमन रेजाको गोलमा अग्रता बनाएको थियो । 
बंगलादेशसँग बराबरी गरेसँगै नेपालको चार खेलबाट ७ अंक भएको छ । नेपाल तालिकाको दोस्रोस्थानमा रहँदै फाइनल प्रवेश गरेको हो । नेपालले यस अघिका खेलमा माल्दिभ्स र श्रीलंका लाई हराएको थियो भने भारतसँग पराजित भएको थियो ।
यससँगै नेपाल पहिलो पटक साफको फाइनलमा प्रवेश गरेको छ । यस अघि नेपालले साफको फाइनल खेल्न सकेको थिएन ।