असोज मसान्तसम्म लक्षितभन्दा बढीलाई कोरोनाविरुद्धको खोप लगाइयो

२ कार्तिक, हेटौंडा । स्वास्थ्य तथा जनसंख्या मन्त्रालयले असोज मसान्तमा कोरोना भाइरसविरुद्धको खोप लक्षित जनसंख्याभन्दा बढीलाई लगाइएको जनाइएको छ । 
मन्त्रालयले असोज मसान्तसम्ममा लक्षित जनसंख्यामध्ये ३३ प्रतिशतलाई खोप लगाउने लक्ष्य राखेकामा त्यो लक्ष्यभन्दा बढीलाई नै खोप लगाएको तथ्यांकमा उल्लेख गरेको छ ।
मन्त्रालयको परिवार कल्याण महाशाखाका निर्देशक डा. विवेककुमार लालले असोज मसान्तभित्र लक्षित वर्गमध्ये ४२ दशमलव २ प्रतिशतलाई पहिलो मात्रा र ३३ दशमलव ५ प्रतिशतलाई पूर्ण मात्राको खोप लगाइएको जानकारी दिए । 
महाशाखाको बाल स्वास्थ्य तथा खोप शाखाका प्रमुख सागर दाहालका अनुसार अहिलेसम्म नेपालमा एक करोड ८८ लाख ५८ हजार सात सय १० मात्रा खोप नेपाल आइसकेको छ ।  उनलले अब दुई करोड ४१ लाख ५८ हजार सात सय ८० मात्रा खोप खरिद र कोभ्याक्स सुविधामार्फत ल्याइने जानकारी दिए ।
प्रमुख दाहालका अनुसार बालबालिकालाई लगाउने फाइजर खोप एक लाख ६ सय २० मात्रा यही अक्टोबरको अन्तिममा ल्याउने तयारी भइरहेको पनि जानकारी दिए । सरकारले १२ देखि १८ वर्ष उमेर समूहका बालबालिकालाई मोडर्ना ४० लाख र ६० लाख फाइजर खोप ल्याएर लगाउने तयारी गरेको छ ।