आईसीसी टी–२० विश्वकपः अफगानिस्तानको विजयी सुरुआत

९ कार्तिक, हेटौंडा । अफगानिस्तानले आईसीसी टी–२० विश्वकप क्रिकेटमा विजयी सुरुआत गरेको छ । सारजाहमा सोमबार भएको खेलमा स्कटल्याण्डलाई १ सय ३० रनले पराजित गर्दै अफगानिस्तानले सुखद सुरुआत गरेको हो ।
अफगानिस्तानले दिएको १ सय ९१ रनको लक्ष्य पछ्याएको स्कटल्याण्ड १० ओभर २ बलमा अलआउट हुँदै ६० रनमा समेटियो । स्कटल्याण्डका जर्ज मुन्सेले २५ रन, क्रिस ग्रेभिसले १२ रन र कप्तान केली कोट्जरले १० रन जोड्नु बाहेका अन्य कुनैपनि ब्याट्सम्यानले दोहोरो अंकको रन बनाउन सकेनन् । अफगानिस्तानका मुजिब उर रहमान एक्लैले ५ विकेट लिए । राशिद खानले ४ तथा नभिन उल हकले १ विकेट लिए ।
यस अघि पहिले ब्याटिङ गरेको अफगानिस्तानले २० ओभरमा ४ विकेट गुमाएर १ सय ९० रन बनाएको थियो । अफगानिस्तानका लागि नाजिबउल्लाह जाड्रनले ५९ रनको अर्धशतकीय इनिङ्स खेले । रहमानउल्लाह गुर्बाजले ४६ रन जोड्दा हज्रातउल्लाह जाजईले ४४ रन बनाए । मोहमद शाहजादले २२ रन तथा कप्तान मोहमद नाबीले अविजित ११ रन बनाए । स्कटल्याण्डका साफ्यन शारिफले २ तथा जोस डेभि र मार्क वाटले १÷१ विकेट लिए ।
जितसँगै समूह २ को अफगानिस्तानले १ खेलमा २ अंक जोडेको छ । अफगानिस्तान शीर्ष स्थानमा रहेको छ ।