राष्ट्रिय भलिबलमा सेमिफाइनल समिकरण पुरा

१ असोज, हेटौंडा । हेटौंडामा जारी केशवलाल श्रेष्ठ स्मृति दोस्रो राष्ट्रिय पुरुष भलिबल प्रतियोगिताको सेमीफाइनल समीकरण पूरा भएको छ । सेमीफाइनलमा आयोजक मकवानपुरसहित तीन विभागीय टोली प्रवेश गरेको छ ।

आईतबार तीन क्वार्टरफाइनल खेल भएका थिए भने शनिबार नै आयोजक मकवानपुर सेमीफाइनल प्रवेश गरेको हो । उपाधी होडमा उभिन नेपाल आर्मीले सशस्त्र प्रहरीको एपीएफ क्लबसँग सोमबार सेमीफाइनल खेल खेल्नेछ भने आयोजकले नेपाल पुलिसको सामना गर्नुपर्नेछ । 

आईतबार नेपाल आर्मीले सिन्धपाल्चोकको सिपा पोखरे युवा सञ्जाललाई २५–१४, २५–१२ र २५–६ को सोझो र सहज सेटमा पराजित गर्दै सेमीफाइनल प्रवेश ग¥यो । सशस्त्र प्रहरीको एपीएफ क्लबले सुदूरपश्चिमाञ्चल टिमलाई २५–१०, २५–२० र २५–१६ को सोझो सेटमा पराजित गर्दै सेमीफाइनलमा स्थान सुरक्षित बनायो । आईतबार भएको अन्तिम खेलमा नेपाल पुलिस क्लबले पश्चिमाञ्चल टिमलाई पाखा लगाउँदै सेमीफाइनल प्रवेश गरेको छ । 

निक्कै प्रतिस्पर्धात्मक खेलमा सेमीफाइनल प्रवेश गर्ने अन्तिम टोली छनौट हुन ५ वटै सेट खेल्नु पर्यो । पहिलो सेट २५–१४ ले आफ्नो पक्षमा पारेको नेपाल पुलिस क्लबले दोस्रो सेट १५–२५ अंकका साथ पश्चिमाञ्चललाई सुम्पियो । तेस्रो सेट पुलिसले २५–१४ ले आफ्नो पक्षमा पार्दै खेल २–१ को स्थितिमा पु¥यायो । चौथो सेट पश्चिमाञ्चलले २५–१९ ले आफ्नो पक्षमा पारेसँगै खेल अन्तिम सेटसम्म धकेलिएको थियो । पाँचौं तथा अन्तिम सेटमा पुलिसले १५–१३ अंकसाथ आफ्नो पक्षमा पार्दै सेमीफाइनल यात्रा सुनिश्चित गर्यो ।

केशवलाल श्रेष्ठ स्मृति केन्द्रीय प्रतिष्ठान मकवानपुर र युवा तथा खेलकुद समन्वय समिति हेटौंडा–१९ को संयुक्त आयोजनामा भइरहेको प्रतियोगिताको उपाधी विजेताले २ लाख रुपैयाँ र उपविजेताले १ लाख रुपैयाँ पाउनेछ ।