प्रितकुमार मोक्तान स्मृति फुटबलमा सिद्धबाबा र मोडर्नको विजय सुरुवात्

google

१२ कार्तिक, हेटौंडा । शहीद प्रितकुमार मोक्तान स्मृति प्रतिष्ठानको आयोजनामा मकवानपुरको मनहरी गाउँपालिका–१ मा शुक्रबारबाट फुटबल प्रतियोगिता सुरु भएको छ । 
प्रतियोगितामा सिद्धबाबा युवा क्लव मनहरी–३ र मोडर्न यूथ क्लव मनहरी–१ ले विजय यात्रा सुरु गरेका छन् । उद्घाटन खेलमा सिद्धबाबाले क्रिश्चियन समाज युवा क्लव ज्यामिरेलाई टाइब्रेकरमा हराएको हो । खेलमा सिद्धबाबाबका गोलरक्षक सुरेश गोङ्बा म्यान अफ द म्याच भए । 
यस्तै दोस्रो खेलमा चुरियामाई युवा क्लवलाई २–१ गोलले हराउँदै मोडर्न यूथ क्लव विजयी भएको छ । खेलमा मोडर्नका सन्जिव स्याङ्तान म्यान अफ द म्याच भए । प्रतियोगितालाई मनहरी गाउँपालिका–१ नम्बर वडा अध्यक्ष शिवप्रसाद खनालले उद्घाटन गरेका हुन् । 
प्रितकुमार मोक्तान स्मृति प्रतिष्ठानका उपाध्यक्ष माधव उप्रेतीको अध्यक्षतामा भएको कार्यक्रममा नेपाली कांग्रेस हेटौंडा ९ नम्बर वडा सभापति वीरेन्द्र लामा, कार्यक्रम संयोजक सागर जिम्बालगायतले मन्तव्य व्यक्त गरेका थिए । 
२६ वटा क्लवको सहभागिता रहेको प्रतियोगितामा विजेता टिमले ५० हजार र उपविजेता टिमले २५ हजार नगदसहित ट्रफी, मेडल र प्रमाणपत्र प्राप्त गर्नेछ । शहीद प्रितकुमार मोक्तानको योगदानलाई जीवन्त राख्दै खेलकुदको विकास र युवाहरुको बीचमा भ्रातृत्वको सम्बन्ध स्थापित गर्न फुटबल प्रतियोगिता आयोजना गरिएको प्रितकुमार मोक्तान स्मृति प्रतिष्ठानका महासचिव हेलिस मोक्तानले जानकारी दिए ।