राष्ट्रिय भलिबलको उपाधी पुलिसलाई

३ असोज, हेटौँडा । हेटौँडामा जारी राष्ट्रिय पुरुष भलिबल प्रतियोगिताको उपाधी नेपाल पुलिसले हात पारेको छ । मंगलबार हेटौँडा–१९ बस्तिपुरमा भएको फाइनल प्रतिष्पर्धामा नेपाल आर्मीलाई सहजै पराजित गर्दै पुलिसले उपाधी हात पारेको हो । पुलिसले आर्मीलाई २५–२०, २५–१६ र २५–२० को सोझो सेटमा पराजित गरेको छ । 
तेस्रो स्थानका लागि आयोजक मकवानपुर र सशस्त्र प्रहरीको एपिएफ क्लवबीचको खेलमा एपिएफ सशस्त्र विजयी भएको छ । एपिएफले आयोजक मकवानपुरलाई २५–१५, २५–१८ र २५–१६ को सोझो सेटमा पराजित गर्दै तेस्रो स्थान हासिल ग¥यो । 
प्रतियोगिताको सर्वोत्कृष्ट खेलाडि पुलिसका कुलबहादुर थापा, उत्कृष्ट स्पाईकर आर्मीका कुलबहादुर भट्ट, लिफ्टर पुलिसका एमबहादुर राना, डिफेन्डर पुलिसका शम्सेर चन्द, व्लकर आमीका भैरव बम र कोच पुलिसका सरोज श्रेष्ठ घोषित भए ।
प्रतियोगितामा पहिलो टिमले नगद २ लाख, दोस्रोले नगद १ लाख, तेस्रोले ४० हजार र चौथोले नगद २५ हजार रुपैँया प्राप्त गरेका छन् । सर्वोत्कृष्ट खेलाडीलाई १५ हजार रुपैँया, उत्कृष्ट व्लकर, लिफ्टर, स्पाईकर, डिफेन्स र लिवेरोलाई जनही ५ हजार रुपैँया प्रदान गरिएको कार्यक्रम संयोजक राजेश भेटवालले जानकारी दिए । 
हेटौँडा उपमहानगरपालिकाका प्रमुख हरिबहादुर महतको प्रमुख आतिथ्यता एवं केशवलाल श्रेष्ठ स्मृति केन्द्रीय प्रतिष्ठान मकवानपुरका अध्यक्ष प्रताप विष्टको अध्यक्षतामा भएको कार्यक्रममा समाजसेवी पुरनबहादुर जोशी, मकवानपुरका प्रमुख जिल्ला अधिकारी चक्रबहादुर बुढा लगायतको सहभागिता रहेको थियो । 
भदौं २० गतेबाट भएको प्रतियोगिता केशवलाल श्रेष्ठ स्मृति केन्द्रीय प्रतिष्ठान र युवा तथा खेलकुद समन्वय समितिको आयोजनामा भएको हो ।

फोटोः सरोज तिमल्सिना