सर्वोच्चमा मंसिर १५ गतेदेखि गोलाप्रथा लागू गर्ने तयारी

९ मंसिर, हेटौंडा । सर्वोच्च अदालतका असन्तुष्ट न्यायाधीशहरूको आग्रहमा आज विहीबार फुलकोर्ट बस्ने भएको छ । बुधबार बसेको असन्तुष्ट न्यायाधिशहरूको फुलकोर्ट बैठक राख्न आग्रह गरेका थिए ।
प्रधानन्यायाधीश चोलेन्द्र शमशेर जबरा बाहेकका न्यायधिसहरूको हिजो बुधबार बैठक बसेको थियो । बैठकले आज बिहीबार फुलकोर्ट बैठक बोलाएर मंसिर १५ गतेदेखि गोलाप्रथा लागू गर्ने गरी अघि बढ्न माग गर्ने निर्णय गरेको हो ।
अघिल्लो साताको फुलकोर्टले पेसी व्यवस्थापन गोलाप्रथाबाट गर्ने निर्णय गरेको थियो । त्यसलाई १५ मंसिरबाट कार्यान्वयनमा लैजानका लागि सूचना प्रकाशनलगायतका आवश्यक तयारी गर्ने निर्णय हिजो बैठकले गरेको हो । 
न्यायाधीशहरूले यस विषयमा सर्वोच्च प्रशासनका कर्मचारीहरूसँग समेत छलफल गरेका थिए । पछिल्लो निर्णयअनुसार सर्वोच्चमा पेसी तोक्ने काम प्रधानन्यायाधीशले एकल रुपमा नभएर पेसी व्यवस्थापन निर्देशन समितिले गर्नेछ । 
उक्त समितिको अध्यक्षता भने प्रधानन्यायाधीशले नै गर्नेछन् । प्रधानन्यायाधीशले समितिको अध्यक्षता गर्ने गरी भएको नियमावली संशोधनमा न्यायाधीशहरू आफैं अल्मलिएका थिए । यद्यपि, उनीहरू निर्णय कार्यान्वयनमा लैजान तयार भएका छन् ।