प्रहरी चौकीद्वारा सुरक्षाबारे छलफल

५ असोज, चौघडा । हेटौँडा–६ मा रहेको प्रहरी चौकी चौघडाले चाडपर्वलाई लक्षित गरी सुरक्षा रणनीतिबारे विहिबार सरोकारवालाहरुसँग छलफल गरेको छ । विजया दशमी, शुभ दिपावली र छठको अवसरमा शुभकामना आदानप्रदानसहित चाडपर्व लक्षित सुरक्षा रणनीतिबारे छलफल गरेको हो । 
कार्यक्रममा प्रहरी चौकीका इन्चार्ज प्रहरी सहायक निरीक्षक सन्तबहादुर कुमालले चाडपर्वमा हुनसक्ने सुरक्षा चुनौति र सामनाका रणनीतिबारे अवगत गराएका थिए । उनले चाडपर्वको समयमा मादकपदार्थ एवं लागुऔषध सेवन, सवारी दुर्घटना, चोरी, लुटपाट जस्ताका घटना बढि हुने भएकाले शान्ति सुरक्षा कायम गर्न प्रहरीलाई सूचना उपलव्ध गराईदिन आग्रह गरे । उनले चाडपर्व रणनीति अनुसार प्रहरी परिचालनमा प्रतिवद्ध रहेको भन्दै नागरिक समाजबाट पनि आप्mनो क्षेत्रमा हुने सुरक्षा चुनौतिबारे समयमै प्रहरीलाई अवगत गराउन आग्रह गरेका थिए । 
कार्यक्रममा हेटौँडा वडा नम्बर ६ का अध्यक्ष अर्जुनप्रसाद चौलागाई, मकवानपुरगढी वडा नम्बर २ का अध्यक्ष बखानसिं पाख्रिन र वडा नम्बर ४ का अध्यक्ष रामप्रसाद तिमल्सिनाले सुरक्षा व्यवस्था कायम गर्न प्रहरीलाई सहयोगको प्रतिवद्धता व्यक्त गरेका थिए । कार्यक्रममा चौकीको कार्यक्षेत्र रहेको हेटौँडा–६ र मकवानपुरगढीका राजनीतिक दल, सामाजिक संघसंस्था, विद्यालय, शैक्षिक एवं वित्तिय क्षेत्रका प्रतिनिधिहरुको सहभागिता रहेको थियो ।