अबको चुनावमा माओवादी शक्तिशाली तेस्रो : प्रचण्ड

६ असोज, हेटौँडा । नेकपा माओवादी केन्द्रका अध्यक्ष पुष्पकमल दाहाल प्रचण्डले आफ्नो पार्टी आगामी प्रदेश र संघीय चुनावमा शक्तिशाली तेस्रो पार्टी बन्ने बताएका छन् । 
हेटौँडामा संचारकर्मीहरुसँग कुरा गर्दै केन्द्रका अध्यक्ष प्रचण्डले पार्टी फुटका कारण अहिले नै देशको पहिलो पार्टी बन्ने अवस्था नरहेको भन्दै आगामी चुनावमा शक्तिशाली तेस्रो बन्ने बताएका हुन् । माओवादी केन्द्रको वरीपरी चौथो शक्ति आई नपुग्ने गरी तेस्रो हुने प्रचण्डको दावि छ । उनले सरकार र राज्य संचालमा माओवादी केन्द्रको भूमिका निर्णायक हुने विश्वास व्यक्त गरे । 
उनले नेपालको निर्वाचन प्रणाली दुई नम्बरीले मात्रै चुनाव लड्न सक्ने खालको भएको बताए । वर्तमान निर्वाचन प्रणाली खर्चिलो भएको भन्दै सामान्य र मध्यम वर्गले चुनाव लड्न सक्ने अवस्था नरहेको बताए । पूँजीपति वा दुई नम्बरीले मात्रै चुनाव लड्ने/लडाउने अवस्था रहेको भन्दै यसलाई परिवर्तन गर्नु जरुरी रहेको धारणा प्रचण्डको थियो । पूर्ण समानुपातिक निर्वाचन प्रणाली र प्रत्यक्ष निर्वाचित कार्यकारीसहितको शासन व्यवस्था हुनुपर्नेमा उनको जोड थियो । 
पूर्व प्रधानमन्त्री समेत रहेका दाहालले आफ्नो प्रयासमा अहिले तराईमा असन्तुष्ट पक्षको सहभागितामा स्थानीय निर्वाचन सम्पन्न भएको भन्दै तराई मधेशका जनताले मतदानमा देखाएको सहभागिताले आफुलाई गौरव महसुस भएको बताए । 
रुपन्देहीको कार्यक्रम विहिबार सकेर काठमाण्डौं जान लागेका प्रचण्ड मौसम प्रतिकुलताका कारण हवाई उडान सम्भव नभएपछि हेटौँडा आईपुगेका हुन् । उनले शुक्रबार विहान पार्टीका नेता कार्यकर्तासँग हेटौँडा गर्दोहीस्थित पार्टी कार्यालयमा भेटघाट पनि गरेका थिए ।