अन्तरपालिका फुटबलको उपाधी थाहाले जित्यो

२६ मंसिर, हेटौंडा । प्रथम अन्तरपालिका पुरुष फुटबल प्रतियोगिताको उपाधी मकवानपुरको उत्तरी क्षेत्रस्ति थाहा नगरपालिकाले जितेको छ । 
जिल्ला समन्वय समिति मकवानपुरको आयोजना तथा जिल्ला खेलकुुद विकास समिति मकवानपुरको व्यवस्थापनमा भएको प्रतियोगिताको शनिबार भएको फाइनल खेलमा हेटौंडा उपमहानगरपालिकालाई हराउँदै थाहाले उपाधी जितेको हो ।
निर्धारित ८० मिनेटकोे खेल २–२ गोलको बराबरीमा सकिएपछि खेल टाइब्रेकरमा धकेलिएको थियो । पहिलो हाफमा २ गोलको अग्रता लिएपनि दोस्रो हाफमा अग्रता जोगाउन नसक्दा हेटौंडाले हार व्यहोर्नु परेको हो । 
निर्धारित खेलअवधिमा हेटौंडाका लागि अनिश महर्जन र बिनोद घलानले एक एक गोल गरेका थिए । यस्तै थाहाका लागि राजन गोलेले एक गोल गरेका थिए भने हेटौंडाका आकाश कटुवालको आत्माघाती गोल उपहार पाएको थियो ।
टाइब्रेकरमा भने थाहाको जितको लागी मनिष मोक्तान, बिशाल स्याङतान, सरोज लामा, सन्देश बल, सन्जिव भोम्जन, मनिष लामा र आदर्श श्रेष्ठले गोल गरे यस्तै हेटौंडाका छिरिङ लामा, बिवेक गुरुङ, बिनोद घलान, ललित चौलागाई, गगन शिलवाल र अनिल थापा मगरले गोल गर्दा फत्यमान घलानको प्रहार बाहिरिएको थियो ।
उपाधीसँगै थाहा नगरपालिकाले नगद २ लाख रुपैयाँ नगद पुरस्कार सहित शिल्ड र मेडल प्राप्त गरेको छ भने उपविजेता बनेको हेटौंडाले १ लाख रुपैयाँमा चित्त बुझाएको छ । प्रतियोगिताअन्तर्गत सर्बोत्कृष्ट खेलाडी हेटौंडाका फत्तेमान घले घोषित हुँदै ५ हजार रुपैयाँ प्राप्त गरे । 
बिधागत रुपमा हेटौंडाका गोलरक्षक सफल तिमल्सिना, हेटौंडाका गोलरक्षक सफल तिमल्सिना, डिफेन्डर गगन सिलवाल, थाहाका फरवार्ड राजन गोले र मिडपिल्डर बिशाल स्याङ्तान, प्रशिक्षक नरेन्द्र मोक्तान प्रतियोगिताको उत्कृष्ट बन्दै जनही ३ हजार रुपैयाँ प्राप्त गरे ।