देशभर चिसो बढ्ने, सतर्कता अपनाउन आग्रह

google

११ मंसिर, हेटौंडा । जल तथा मौसम विज्ञान विभाग अन्तर्गतको मौसम पूर्वानुमान महाशाखाले आजपनि देशका अधिकांश भू–भागमा मौसम बदली रहने बताएको छ । 
महाशाखाका अनुसार हाल देशमा पश्चिमी वायुको प्रभाव रहेको भन्दै सुदुरपश्चिम तथा कर्णाली प्रदेशहरूमा आंशिकदेखि सामान्य बदली रही बाँकी प्रदेशको पहाडी भू–भागहरूमा आंशिक बदली रहने छ । महाशाखाले आज बिहान सार्वजनिक गरेको मौसम सम्बन्धी जानकारी अनुसार आज दिउँसो गण्डकी प्रदेश, लुम्बिनी प्रदेश, कर्णाली प्रदेश र सुदुरपश्चिम प्रदेश लगायत अन्य पहाडी भू–भागमा आंशिकदेखि सामान्य बदली रही बाँकी भू–भागमा आंशिक बदली रहनेछ । 
पहाडी भू–भागको एक–दुई स्थानहरूमा हल्का वर्षाको सम्भावना रहेको पनि महाशाखाले जनाएको छ । देशको उच्च पहाडी तथा हिमाली क्षेत्रका थोरै स्थानमा हल्का हिमपातको सम्भावना छ । यस्तै आजराति देशभर आंशिकदेखि सामान्य बदली रहनेछ । सुदुरपश्चिम र कर्णाली प्रदेश का एक–दुई स्थानमा हल्का वर्षाको सम्भावना रहेको छ । 
देशको उच्च पहाडी तथा हिमाली क्षेत्रका केही स्थानहरूमा हल्का हिमपातको सम्भावना रहेको तथा देशका पहाडी भू–भागको एक वा दुई स्थानहरुमा हल्का वर्षाको सम्भावना रहेको र तराईका भू–भागहरूममा बिहानको समयमा हुस्सु÷कुहिरो लाग्नुका साथै देशभर चिसो बढ्ने क्रममा रहेकोले चिसोबाट बच्न आवश्यक सुरक्षा एवं सतर्कता अपनाउन पनि महाशाखाले आग्रह गरेको छ ।