बडादशैँको नवौँ दिन, आज महानवमी पर्व मनाईदैं

१३ असोज, हेटौँडा । आज बडादशैँ अन्तर्गत नवरात्रिको नवौं दिन, आजको दिन दुर्गा माताको नवौं शक्ति स्वरुपा माता सिद्धिधात्रीको विशेष पूजा अनुष्ठान गरि महानवमी पर्व मनाईदै छ । साथै आजको दिन धनधान्यकी देवी माता महालक्ष्मीको पनि पूजा अर्चना गरिन्छ । आजको दिन शक्तिस्वरुप सिद्धिधात्रीको पूजा गर्नाले सम्पूर्ण संसारनै जित्नसक्ने सिद्धता हासिल हुने र संसारमा केही कुरापनि अगम्य नहुने धार्मीक मान्यता रहिआएको छ ।
यस्तै आजको दिन निर्माण र शिल्पकला अनि कलपूर्जाका देवता विश्वकर्माको दिनकारुपमा पनि लिइन्छ, इञ्जिनहरु, गाडी, कारखाना आदिमा वलि चढाइन्छ । आजको दिन नेपाली सेनाको मुख्यालय, प्रहरी प्रधान कार्यलय लगायतका ठाँउमा कलपूर्जा, हतियार र गाडीहरुको विशेष पूजा सहित जङ्गी निशान पूजा र कोत पूजा पनि गरिन्छ ।
वलि दिनकालागि आज उपत्यका भित्रका दक्षिणकाली, गुहेश्वरी, मैतीदेवी, कालिकास्थान, शोभाभगवती, विजेश्वरी, इन्द्रायणी, रक्तकाली, सङ्कटा, बज्रयोगिनी, बज्रवाराही लगायतका शक्तिपीठहरुमा भक्तजनहरुको विशेष घुँइचो लाग्नेगर्दछ । यसैगरि उपत्यका बाहिर पर्साको विन्देवासिनी, वीरगञ्जको गहवामाईमा, काभ्रेको पलाञ्चोक भगवती, सप्तरीको छिन्नमस्ता, डडेलधुराको उग्रतारा, जनकपुरको राजदेवी, गोरखाको मनकामना, मकवानपुरको चुरियामाई र भुटनदेवी लगायत शक्तिपीठ र मन्दिरहरुमा बोका, हाँस, कुखुरा र राँगाको वलिसहित पूजाअर्चना र सप्तशती पाठ गरिन्छ ।
फोटोःगुगल