आज सोनाम ल्होछार ताक ल्हो (बाघ बर्ष) सुरु

१९ माघ, हेटौंडा । आज माघ शुक्ल प्रतिपदा अर्थात तामाङ समुदायले नयाँ वर्षको रुपमा मनाउने सोनाम ल्होछार पर्व देशभर छरिएर रहेका तामाङ समुदायले विविध कार्यक्रमको आयोजना गरी यो पर्व मनाउँदै छन् ।
तिब्बती परम्परा अर्थात मञ्जुश्री पात्रोअनुसार आजदेखि २८५८ ताक ल्हो (बाघ बर्ष) सुरु हुन्छ । मञ्जुश्री पात्रो अनुसार आजदेखि २८५७ गाई वर्ष पूरा भई बाघ वर्ष सुरु भएको हुन्छ ।
तामाङ समुदायमा सोनाम ल्होछारलाई मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर र सुँगुर गरी १२ वर्गमा विभाजन गरिएको छ ।
तामाङ जातिको बाहुल्यता रहेको बागमती प्रदेशका विभिन्न जिल्लामा यो पर्व विशेषरुपमा मनाइन्छ । यस वर्षको पर्वमा आज सरकारले देशभर सार्वजनिक बिदा दिएको छ ।
सोनाम ल्होछार विभिन्न भागमा बसोबास गर्ने तामाङसहित ह्योल्मो, थकाली, जिरेल, नेस्याङ्वा, भोटे, दुरा, लेप्चा आदि जातिले समेत आ–आफ्नै शैली र परम्पराअनुसार यो पर्व मनाउँने गरेका छन् ।
विगत वर्षहरुमा सोनाम ल्होछारका अवसरमा सांस्कृतिक झाँकीसहित बाजागाजाको ¥याली निकालिने गरिएको भएपनि यसबर्ष ओमिक्रोन भेरियन्टसहितको कोरोना महामारीका कारण औपचारिक कार्यक्रम भने कमै राखिएको छ ।