गाँजा र अफिम खेती नष्ट गर्न मकवानपुर प्रहरीको सकृयता

फोटो:जिप्रका मकवानपुर

२४ माघ,हेटौंडा। मकवानपुर प्रहरीले गाँजा र अफिम खेती फडानीको अभियान नै थालेको छ। यसक्रममा माघ महिनाको २१ गतेबाट २३ गते आइतबार दुईदिनसम्म प्रहरीले जिल्लाको विभिन्न स्थानको २९ बिगाह १० कठ्ठामा खेति गरिएको  लागुऔषध गाँजा र २१ बिगाहमा लगाइएको अफिम फडानी गरेर नष्ट गरेको छ। 

जिल्ला प्रहरी कार्यालय मकवानपुरका निमित्त प्रहरी प्रवक्ता प्रहरी निरीक्षक देवेन्द्र दासले कैलाश र राक्सिराङ गाउँपालिकाको विभिन्न वडामा  अन्दाजी २९ बिगाह १० कठ्ठामा खेति गरिएको लागुऔषध गाँजा र २१ विगाहमा लगाइएको अफिम खेतीलाई फडानी गरेर नष्ट गरेको जनाएका छन।  

उक्त स्थानमा लगाइएको र खेति गरिएको लागुऔषध गाँजा र अफिम लागुऔषध व्युरो कोटेश्वर काठमाडौं,बागमती प्रदेश प्रहरी कार्यालय हेटौंडा,सशस्त्र प्रहरी गण राटोमाटेबाट प्रहरी निरीक्षक सहित खटिगएको करिब १५० जनाको प्रहरी टोलीले फडानी गरेर नष्ट गरेको प्रहरी निरीक्षक दासले बताए। 

जिल्ला प्रहरी कार्यालय मकवानपुरका प्रहरी प्रमुख प्रहरी उपरीक्षक सुरेन्द्र बहादुर गुरुङले जिल्लाभर अवैध रुपमा लगाइएको गाँजा र अफिम खेती पहिचान गरी नष्ट गर्ने अभियान सुरू गरिने बताएसँगै मकवानपुर प्रहरीले मकवानपुरको बिकट स्थानमा लगाइएको अबैध लागुऔषध खेतीलाई अभियाननै सञ्चालन गरेर फडानी गरेर नष्ट गर्न थालेको हो।