चारदेशीय टी–२० सिरिजमा नेपाल टेष्ट राष्ट्र आयरल्याण्डसँग पराजित

३ फागुन, हेटौंडा । ओमानमा जारी चारदेशीय टी–२० सिरिज अन्तर्गत अन्तिम खेलमा नेपाल टेस्ट राष्ट्र आयरल्याण्डसँग पराजित भएको छ । अल अमेरात क्रिकेट मैदानमा सोमबार भएको खेलमा नेपाल आयरल्याण्डसँग १६ रनले पराजित भएको हो । 
आयरल्याण्डले दिएको १ सय २८ रनको लक्ष्य पछ्याएको नेपालले २० ओभरमा ९ विकेट गुमाएर १ सय ११ रन मात्र बनाउन सक्यो । नेपालका लागि दिपेन्द्र सिंह ऐरीले सर्वाधिक २८ रन बनाए । आशिफ शेख २३ रनमा आउट हुँदा कुशल भुर्तेलले १५ र कमल ऐरी १३ रन बनाए । बाँकि खेलाडीले दोहोरो अंकको रन समेट बनाउँन सकेनन् ।
आयरल्याण्डका सिमि सिंह, एन्डी म्याकब्राइन, मार्क एडिर र बेरी मकार्थीले २÷२ विकेट लिए । यस अघि टस हारेर पहिले ब्याटिङ गरेको आयरल्याण्डले २० ओभरमा अलआउद हुदै १ सय २७ रन बनाएको थियो । आयरल्याण्डका लागि जर्ज डोकरेलले सर्वाधिक २८ रन जोड्दा कर्टिस क्याम्फरले २०रन बनाए । 
नेपालका लागि दिपेन्द्र सिंह ऐरीले सर्वाधिक ४ विकेट लिए । उनले चार ओभर बलिङ गर्दै २१ रन मात्र खर्चिएका थिए । यसैगरी नेपालका लागी अविनाश बोहराले दुई विकेट लिदा सन्दीप लामिछाने, कमल सिंह ऐरी र जितेन्द्र मुखियाले १÷१ विकेट लिए । 
हारसँगै नेपालले ३ खेलमा २ अंक जोड्यो । नेपाल पुछारमा रह्यो । आयरल्याण्डले ३ खेलमा ४ अंक जोड्यो । आईसीसी पुरुष टी–ट्वान्टी विश्वकप छनोट अन्तर्गतको ग्लोबल छनोट ए अघि नेपालले चारदेशीय सिरिज खेलेको हो ।