चेपाङ हत्या गर्नेमा संलग्न सैनिकलाई जन्मकैद

९ फागुन, हेटौंडा । नेपाली सेनाको कुटाईबाट मृत्यु भएका चितवन राप्ति नगरपालिका २ का राजकुमार चेपाङको हत्यामा संलग्न देखिएको भन्दै उच्च अदालत पाटन हेटौंडा इजलासले कुटपिट गर्ने नेपाली सेनाका एक जवानलाई जन्मकैदको फैसला सुनाएको छ । 
उच्च अदालत पाटन हेटौंडा इजलासले जिल्ला अदालतले चितवनले गरेको निर्णयलाई उल्ट्याउँदै उच्च अदालतले पाटन इजलास हेटौंडाले नेपाली सेनाको सिद्धिबक्स गणका हुद्दा  चिरणकुमार बुढालाई जन्मकैदको सजाय सुनाएको हो । पाटन उच्च अदालतको हेटौंडा इजलासका न्यायाधीशद्वय चण्डीराज ढकाल र नागेन्द्रलाल कर्णको इजलासले जन्मकैदको  फैसला गरेको छ । चितवन राष्ट्रिय निकुन्जमा २०७८ असार १ गते निहुरो टिप्न गएका बुढाको यातनाका कारण घाइते भएका चेपाङको २०७८ साउन ७ मा अस्पतालमा उपचार क्रममा मृत्यु भएको थियो । 
चितवन जिल्ला अदालतले गत असार २८ मा बुढालाई ९ महिना कैद, ९ हजार रुपैयाँ जरिवाना र मृतकका परिवारलाई दुई लाख रुपैयाँ क्षतिपूर्ति भराउने फैसला गरेको थियो । त्यसविरुद्ध पीडितका तर्फबाट उच्च सरकारी वकिलको कार्यालय हेटौंडाले पुनरावेदन गरेको थियो । ९ महिना सजाय हुने गरी कसुर ठहर भएकाले जागिर गुमाउन पुगेका बुढाले पनि उच्च अदालतमा पुनरावेदन गरेका थिए ।
दुवैतर्फको पुनरावेदनमा उच्च अदालतले जिल्ला अदालतको फैसला उल्ट्याउँदै पीडितको मागअनुसार बुढालाई जन्मकैदको सजाय हुने गरी फैसला गरेको उच्च अदालत पाटन हेटौंडा इजलासका रजिस्ट्रार कैलाश भट्टराईले जानकारी दिए ।