ग्लोबल छनोटको सेमिफाइनलमा नेपाल र युएईले आज प्रतिस्पर्धा गर्ने

google

१० फागुन, हेटौंडा । आईसीसी पुरुष टी–२० विश्वकप छनोट अन्तर्गतको ग्लोबल छनोट ‘ए’ को सेमिफाइनलमा नेपालले आज युएईको सामना गर्दै छ । खेल ओमानको अल अमेरातमा नेपाली समय अनुसार दिउँसो ३ः४५ बजे सुरु हुनेछ । 
टी–२० विश्वकपमा छनोट हुने लक्ष्य बोकेको नेपालका लागि आजको खेल जित्नैपर्ने छ । आजको खेलबाट नेपालको विश्वकप यात्राको टुङ्गो लाग्ने छ । नेपाल आज युएईलाई हराएर फाइनल पुग्न चाहन्छ भने युएई पनि नेपाललाई हराएर फाइनल पुग्न चाहन्छ ।
खेलमा विजेता बन्दै फाइनल पुग्ने टोली अष्ट्रेलियामा आगामी अक्टोबर १६ देखि नोभेम्बर १३ सम्म हुने आईसीसी पुरुष टी–२० विश्वकपका लागि छनोट हुनेछन् । नेपालले सन् २०१४ मा बङ्गलादेशमा आयोजना भएको टी–२० विश्वकप खेलेको थियो । त्यसयता नेपाल छनोटमा असफल हुँदै आइरहेको छ । 
छनोटको समूह ‘बी’ को नेपाल समूह विजेता बनेर सेमिफाइनल पुगेको हो । नेपालले ३ खेलमा ३ जितसहित ६ अङ्क जोडेको थियो । युएई समूह ‘ए’ को उपविजेता बन्दै सेमिफाइनलमा पुगेको हो । 
नेपाल र युएईबीचको पछिल्लो हेड टु हेड बराबरीको स्थितिमा रहेको छ । नेपाल र युएईबीचको पछिल्लो चार टी–ट्वान्टी खेलमा दुबैले २ जित र २ हार व्यहोरेका छन् ।