१५ दिने प्रसिद्ध मिथिला परिक्रमा आजदेखि शुरु  

file photo

१९ फागुन, हेटौंडा । प्रसिद्ध मिथिला माध्यमिकी परिक्रमा यात्रा आजदेखि शुरू भएको छ । फाल्गुन आँैसीदेखि पूर्णिमासम्म चल्ने मिथिला माध्यमिकी परिक्रमामा धनुषा, महोत्तरी र भारत विहारका दर्जनौं धार्मिक तथा ऐतिहासिक ठाउँहरूको करिव १ सय २० किलोमिटर पैदल यात्रा गरिन्छ । 
मिथिला माध्यमिकी परिक्रमाको पहिलो दिन आज धनुषाको कचुरीमा रहेको मिथिला विहारी मन्दिरमा झाँकी कीर्तनसहित रामजानकीको डोला जनकपुरधामको रत्नसागर मठ हुँदै जानकी मन्दिर पु¥याएको छ । जानकीको डोलासँगै जनकपुरका विभिन्न मठमन्दिरबाट ल्याइएका डोलाहरू समावेश गरेर जनकपुरको हनुमानगरबाट परिक्रमा यात्रा प्रारम्भ हुने गर्छ ।
१५ दिने परिक्रमाअन्तर्गत जनकपुरको हनुमान नगर, विहारको कलनास्थित कल्यानेश्वर महादेव, फूलहरमा रहेको गिरिजा स्थान, करुण, विसौल, महोत्तरीको मठिहानी, जलेश्वर, मडैई, धुव्रकुण्ड, कञ्चनवन, पर्वता, धनुषाको धनुषाधाम, सतोखर, औरही र यात्राको अन्तिम दिन अर्थात् १५औं दिनमा जनकपुरको अन्तरगृह परिक्रमा गरी मध्यमा मिथिला परिक्रमा सम्पन्न हुन्छ ।
रामजानकीको डोलासँगै परिक्रमा गर्दा विभिन्न प्रकारका रोग, दुःख, कष्ट कलेशबाट मुक्ति प्राप्त हुने धार्मिक विश्वास छ । यस परिक्रमामा नेपालको धनुषा, सिरहा, सप्तरी, महोत्तरी, सर्लाही र सीमावर्ती भारतीय राज्य विहारको सीतामढी, मधुबनी, दरभंगा सहितका जिल्लाबाट लाखौं श्रद्धालुभक्तजन र साधुसन्तहरूको सहभागिता रहने गर्छ ।