शनिबारबाट हुने प्रदेश खेलकुदको तयारी पूरा

२७ फागुन, हेटौंडा । यही २८ गते शनिबारबाट सुरु हुन लागेको प्रथम बागमती प्रदेश खेलकुद प्रतियोगिताको तयारी पूरा भएको छ । प्रदेश खेलकुद विकास परिषद् बागमती प्रदेशको आयोजना हुन लागेको प्रतियोगिताको तयारी पूरा भएको जानकारी दिइएको छ ।
प्रदेशको युवा तथा खेलकुद मन्त्रालयको सहयोगमा हुन लागेको प्रदेश स्तरीय खेलकुद प्रतियोगिताको सम्पूर्ण तयारी पूरा भएको प्रदेश खेलकुद विकास परिषद्का सदस्य सचिव सूर्यलाल भण्डारीले जानकारी दिए । प्रदेश राजधानी हेटौंडामा शनिबार विशेष कार्यक्रमकाबीच प्रतियोगिताको उद्घाटन हुनेछ । 
हेटौंडाको क्याम्पाचौरमा नेपाल आर्मी, नेपाल प्रहरीको व्याण्ड सहितको प्रस्तुती, विद्यार्थीहरुद्धारा ड्रिल प्रदर्शन, अतिसबाजी, मार्सल आट्र्स डेमो, विभिन्न झाँकी तथा साँस्कृतिक कार्यक्रमहरुको आयोजना हुनेछ । प्रतियोगिताको उद्घाटन मुख्यमन्त्री राजेन्द्रप्रसाद पाण्डेले गर्ने कार्यक्रम तय भएको छ । 
मकवानपुर, चितवन, काभ्रे, काठमाडौं र सिन्धुपाल्चोक जिल्लामा विभिन्न खेलको प्रतियोगिता गराइने सदस्य सचिव भण्डारीले बताए । मकवानपुरमा २९ गते आइतबारबाट पुरुष फुटबल, व्याडमिन्टन र चैत्र ५ गतेबाट तेक्वान्दो प्रतियोगिता सुरु हुनेछ । चितवनमा ३० गतेदेखि भलिबल र क्रिकेट खेल सुरु हुनेछ । 
सिन्धुपाल्चोकमा चैत्र ७ गतेबाट कराँते खेल हुनेछ भने काठमाडौंमा चैत्र ६ गतेदेखि एथ्लेटिक्स प्रतियोगिता हुनेछ भने काभ्रेमा ७ गतेदेखि महिला फुटबल र ९ गतेदेखी बक्सिङको प्रतियोगिता हुनेछ । 
प्रतियोगिताको लागि ८ करोड ४ लाख रुपैयाँ रकम खर्च हुने अनुमान गरिएको छ । विभिन्न खेलमा करिब २ हजार भन्दा बढी खेलाडीले सहभागिता जनाउनेछन् । प्रतियोगिताको समापन कार्यक्रम १२ गते शनिबार काभ्रेको धुलिखेलमा हुने तय भएको छ ।