मकवानपुरको शान, पिप्ले क्याम्पा रंगशाला उदघाटन

२७ फागुन,हेटौंडा । हेटौंडा-५ क्याम्पाडाडाँमा रहेको नव निर्मित  पिप्ले क्याम्पा रंगशालाको उदघाटन गरिएको छ। 

निर्माण सुरु गरेको १ वर्ष १६ दिनमै निर्माण सम्पन्न भइ शुक्रबार एक समारोहका बीच उक्त रंगशालाको उदघाटन गरिएको हो। रंगशालाको हेटौंडाका नगर प्रमुख हरि बहादुर महतले उदघाटन गरेका हुन। 
रंगशाला निर्माण अभियान पिप्ले युवा क्लब तथा क्लबका अध्यक्ष सुशिल घिमिरेको अगुवाई तथा स्थानीय सरोकारवाला निकायको समन्वयमा करिब १ वर्ष अघीबाट सुरु गरिएको थियो।करिब ५ हजार दर्शक अट्ने सक्ने प्याराफिट सहितको उक्त रंगशाला करिब १ करोड ७० लाख रुपैयाँको लागतमा निर्माण गरिएको क्लबका अध्यक्ष सुशील घिमिरेले बताएका छन्। 
"रंगशालामा फुटबलसहित एथ्लेटिक्सका लागि ट्रयाक समेत निर्माण गरिएको र अब रंगशाला परिसरमै कभर्ड हल निर्माण गरेर करिब २० हजार दर्शक अट्ने प्याराफिट निर्माण गर्छौ"-घिमिरेले भने। 
रंगशाला निर्माणका लागि हेटौंडा उपमहानगरपालिका ,वडा नम्बर ५ का  स्थानीय तथा वडावासीको तर्फबाट १ करोड ३९ लाख रुपैयाँ, विभिन्न सहयोगी संस्था एवम् व्यक्तिहरुबाट करिब ३० लाख रुपैयाँ सहयोग प्राप्त भएको जनाइएको छ। 
उदघाटन कार्यक्रममा बोल्दै नगर प्रमुख महतले  प्याराफिट सहितको रंगशाला निर्माणले खेलप्रमीलाई प्याराफिटमा बसेर खेल हेर्न हौसला मिल्ने बताए।आज उदघाटन गरिएको रंगशालामा भोलि शनिबारबाट हुने बागमती प्रदेश स्तरीय खेलकुद प्रतियोगिताको उदघाटन हुदैछ।खेलकुद प्रतियोगिताको उदघाटन बागमती प्रदेशका मुख्यमन्त्री राजेन्द्र प्रसाद पाण्डे गर्ने जनाइएको छ।