पहिलो टी–२० खेलमा नेपाल जिम्बावे ए सँग पराजित 

१९ बैशाख, हेटौंडा । जिम्बावे ए टिमविरुद्धको पहिलो टी २० खेलमा नेपाली टिम पराजित भएको छ । कीर्तिपुर मैदानमा भएको खेलमा नेपाल ६ विकेटले पराजित भएको हो । 
टस हारेर पहिला ब्याटिङ गरेको नेपालले निर्धारित २० आोभरमा ७ विकेट गुमाउँँदै १८१ रन बनाएको थियो । नेपालले पहिलो विकेट २७ रन हुँदा गुमाएको थियो । ओपनर आशिफ शेख व्यक्तिगत ९ रनमा गुमाएको हो । 
त्यस्तै दोस्रो विकेट टिमको स्कोर ८४ रन हुँदा गुमाएको थियो । कुशल भुर्तेल ४६ रनमा आउट भएका थिए । ३१ बल खेलेका कुशलले ८ चौका प्रहार गरेका थिए । स्कोर बोर्डमा १२३ रन जोड्दा रोहित पौडेल ३६ रन बनाउँदै आउट भएका थिए । 
दिपेन्द्र २८  रनमा रनआउट भएका थिए । त्यस्तै आरिफ दुई रन बनाएर पविलियन फर्किए । मोहम्मद अदिल अन्सारी ४७ रनमा तथा करण केसी ४ रनमा अविजित रहे । जिम्बावे ए का लागि ब्राड इभान्स, लुके जोंगे, ब्राण्डन माभुता र जोन मसाराले समान एक एक विकेट लिए । 
जवाफमा जिम्बावे ए टिमले १८ ओभर पाँच बलमा चार विकेट गुमाउँदै लक्ष्य पुरा गर्यो । बलियो सुरुवात गरेको जिम्बावे ए टिमले पहिलो विकेटका लागि ७३ रनको साझेदारी गरेको थियो । 
जिम्बावे ए टिमको जितमा इनोसेन्ट काइयाले ४७ रन बनाए भने टाडीवान्से मरुमानीले ५६ रन बनाए भने कप्तान टोनी मुनोयोंगाले ५० रन बनाए ।
जितसँगै जिम्बावे ’ए’ ले ३ खेलको सिरिजमा १–० को अग्रता बनाएको छ । आईसीसी पुरुष क्रिकेट विश्वकप लिग टु अन्तर्गत अमेरिकामा हुने त्रिकोणात्मक एकदिवसीय सिरिजको तयारीमा स्वरूप नेपालले जिम्बावे ’ए’ सँग सिरिज खेलिरहेको हो । सिरिज अन्तर्गत नेपालले पाहुना टोलीसँग दोस्रो खेल सोमबार र तेस्रो खेल बुधबार खेल्नेछ  ।