लैंगिक हिंसा र बलात्कारसम्बन्धी कानुनको पुनरावलोकन गर्नुपर्ने माग

१२ जेठ, हेटौंडा । नेपाली कांग्रेसका महिला नेतृहरुले बलात्कार र लैंगिक हिंसासम्बन्धी कानुनको पुनरावलोकन गर्न माग गरेका छन् । ललितपुरको सानेपास्थित केन्द्रीय कार्यालयमा बुधबार पत्रकार सम्मेलन गर्दै उनीहरुले बलात्कार र लैंगिक हिंसासम्बन्धी कानुनको पुनरावलोकन गर्नुपर्ने माग गरेका हुन् ।
पत्रकार सम्मेलनमा पार्टीको केन्द्रीय सहमहामन्त्री महालक्ष्मी उपाध्याय डिनालगायतले लामो समयदेखि निरन्तर प्रयास गरे पनि लैंगिक हिंसा र बलात्कारसम्बन्धी घटना नरोकिएकाले वर्तमान कानुनी व्यवस्थामा पुनरावलोकन गरी कडा सजायसहितको व्यवस्था राखेर संशोधन गर्नुपर्ने माग गरेका हुन् । 
पत्रकार सम्मेलनमा सहमहामन्त्री डिनाले अहिलेका कानुन र त्यसको कार्यान्वयनको अवस्थाबारे पुनरालोकन गर्नुपर्ने बेला आएको बताईन उनले किन यौन हिंसा र बलात्कार रोकिएको छैन भन्ने कुराको तथ्य खोज्नुपर्नेमा जोड दिईन । उनले लैंगिक हिंसा र बलात्कारका घटनाका दोषीलाई कडा सजायको व्यवस्था गरिनुपर्ने माग गर्दै बलात्कारको मुद्दामा उजुरीमै लाग्ने हदम्यादको व्यवस्थालाई तत्काल सच्याउन माग गरिन् । 
यसअघि बुधबारै महिला नेतृहरुले प्रधानमन्त्री शेरबहादुर देउवालाई भेटी बलात्कारसम्बन्धी मुद्दामा जाहेरीका लागि तोकिएको हदम्यादको व्यवस्था खारेज गर्नुपर्ने भन्दै ध्यानकर्षपत्र बुझाएको थिए । उक्त आवसरमा प्रधानमन्त्री देउवाले त्यसबारे सरकारले आवश्यक तयारी अघि बढाइसकेको जानकारी गराएका थिए ।