तारा एयरको सम्पर्कविहीन विमान दुर्घटनाग्रस्त अवस्थामा भेटियो

दुर्घटनाग्रस्त अवस्थामा फेला परेको विमान

१६ जेठ,पोखरा। आइतबार  बिहान १९ यात्रु बोकेर पोखराबाट जोमसोमका लागि उडेको सम्पर्कविहीन तारा एयरको विमान  दुर्घटनाग्रस्त अवस्थामा फेला परेको छ । 

मुस्ताङको थासाङ गाउँपालिका वडा नम्बर २  स्थित भिरमा विमान दुर्घटनाग्रस्त अवस्थामा फेला परेको नेपाली सेनाका प्रवक्ता नारायण सिलवालले जानकारी दिएका छन् ।नेपाली सेनाका प्रवक्ता नारायण सिलवालका अनुसार ल्याङखु खोलाको मुहान नजिकको पहाडमा ठोक्किएर टुक्रा–टुक्रा भएको अवस्थामा जहाज फेला परेको हो। स्थानीय शेर्पाहरुले विमान दुर्घटनाग्रस्त अवस्थामा फेला पारेको र उक्त स्थानमा अहिले सेनाको टोली पुग्ने क्रममा रहेको जनाइएको छ। 
आइतबार बिहान ९:५५ मिनेटमा उडान भरेको उक्त विमान उडेको केही समयपछि सम्पर्कविहीन भएको थियो। सम्पर्कविहीन विमानको हेलिकप्टर मार्फत र पैदल मार्फत खोजी कार्य गरिएको भएपनि साझ सम्म फेला पर्न सकेको थिएन ।
उक्त जहाजमा चालक दलका प्याप्टेन प्रभावकर घिमिरेले उडाएका थिए भने सहचालक उत्सव पोखरेल र एयर होस्टेज किस्मी थापा रहेकी थिइन।   त्यसैगरी विमानमा सवार  इन्द्र बहादुर गोले, पुरुषेत्तम गोले, राजन कुमार गोले, मिक ग्र्याट, बसन्त लामा, गणेश नारायण श्रेष्ठ, रवीना श्रेष्ठ, रस्मी श्रेष्ठ, रोजिना श्रेष्ठ, प्रकाश सुनुवार, मकर बहादुर तामाङ, राममाया तामाङ, सुकुमाया तामाङ, तुल्सादेवी तामाङ, अशोक कुमार त्रिपाठी, धनुष त्रिपाठी, ऋतिका त्रिपाठी, युवी विल्नर र वैभवी बाण्डेकर रहेका थिए। जसमा ४ भारतीय,२ विदेशी,१३ नेपाली र  चालक दलका ३ सदस्य सहित कुल २२ जना सवार थिए।

तस्विर: सामाजिक सञ्जाल